Opinionan dividi riba decision di AVP pa no participa den debate pa Millenials

For di diamars ultimo rumornan a cuminsa circula cu AVP no lo ta participando den e dabate di Millenials despues di a confirma algun siman atras cu nan lo ta participando den e debate cu ta lidernan di partido. ( Mira Flyer ). Algun dia promer cu e debate den seno di partido AVP a bini cu e sugerencia pa no manda e lider di partido pa un debate di lider pero pa manda e candidato hoben Gerlien Croes. Esaki no a wordo acepta mirando cu for di comienso e invitacion a bay pa tur lider di partido mirando cu esey ta e concepto di cual tur partido a acepta e invitacion (10).

Por nota den comunidad un cantidad grandi di persona, millenials y hasta sostenedornan di partido AVP mes no a keda contento cu e decision final pa no participa den e debate. Di otro banda tin sostenedornan cu si ta di acuerdo cu e decision pa no participa.

E observacion:

Pa mas di tres luna un grupo di 20 Millenials a cuminsa traha duro riba e proyecto aki pa por organisa un debate entre lidernan di partido pa nan por debati riba topiconan cu ta alcaso pa e millenials. E unico intencion tras di e evento ta pa por comparti informacion cu e millenials. Un iniciativa cu sigur ta di aprecia. E ta un tiki dificil pa compronde con un politico/partido ta wordo invita pa participa den un debate di lider ( Simanan Atras) , ta manda confirmacion y algun dia promer kier cambia e reglanan di un debate cu e no a organisa. Pa cambia e concepto di e debate lo por a drenta como un sugerencia kizas hopi mas promer. E parti mas lamentabel ta cu sostenedornan di e partido a cuminsa un campaña riba rednan social purbando na pinta e organisacion di e debate den luz negativo debi cu nan no lo kier acepta un candidata hoben di AVP pa representa e partido. Si acaso e debate su concepto tabata cu cada partido por escohe kende lo representa nan, probablemente no lo tabata ningun problema. Sinembargo esey no ta e concepto di e debate.

Por a tuma varios comentario di sostenedornan di AVP mes cu e decision di no participa lo tin mas efecto negativo cu positivo pa e partido mirando cu e grupo di millenial voters (25.000) ta mira esaki como un decision incorrecto mirando cu nan kier tende di tur partido den e debate aki cual ta completamente bendi y lo wordo transmiti bibo via Tele Aruba. Esaki ta un potencial grandi pa comunica directamente cu e grupo importante di votador.

Otro grupo ta para banda di e partido pa cu e decision mirando cu nan ta convenci cu e candidata hoben ( Gerlien Croes ) tin tur e capacidad pa representa e partido den e debate. Aunke mester bisa cu esaki no ta e motibo cu e no por participa den e debate, pero simplemente debi na e concepto di e debate pa lidernan di partido.

Sigur lo ta un bon idea pa ainda promer cu eleccion kizas den un escala mas chiquito organisa un debate/encuentro publico of via television cu un representante specifico di millenials pa cada partido.