Servicio Meteorologico di Aruba (METEO) a emiti un boletin di tempo valido pa diahuebs 12 di juli 2018, den cual ta pronostica cu shelo lo ta levemente te parcialmente nubla y generalmente seco. Sinembargo marduga y den dia por spera mas nubia cu posibilidad pa awasero breve. E alerta pa biento duro y lama bruto ta sigui na vigor.
Den proximo 24 ora, un Ola Tropical lo pasa den area di Caribe direccion west. Humedad di e sistema aki por atrae mas nubia den nos region cu por causa awasero local. Stof fini den aire lo reduci visibilidad durante proximo dos dianan.
Horcan Chris tabata situa zuidwest di Cape Race, New Foundland y ta moviendo den direccion noordoost. E sistema aki no ta forma peliger pa nos region.
Pronostico di tempo pa proximo dianan di siman ta shelo parcialmente nubla cu posibilidad pa awasero breve. Biento lo supla for di direccion oost y modera te basta fuerte; Den dia fuerte te posiblemente hopi duro cu rafaga; Temperatura max / min lo ta: 33/27.
