For di december 2017 e personal di Bureau Centro Multidisciplinario (MdC) a vocifera nan preocupacionnan cerca SEPPA tocante e decision tuma di e Minister di Educacion, Ciencia y desaroyo sostenibel, pa loke ta trata e personal y e servicionan cu ta duna cu alavez tin nan consecuencianan negativo pa e alumnonan cu mester di mas cuido y guia ariba nos isla.
E preocupacionnan menciona ta:
- Ceramento di dos di e tres gruponan di e Centro di observacion. E centro aki ta un departamento di MDC cu tin e facilidadnan disponibel pa trata cu alumnonan cu condicionan compleho y specifico na edadnan di kleuter y di klas 1. Aki ta trata di alumnonan cu e ayudo actual na scol no ta suficiente y adecua, hasta ora cu nan tin guia specifico ambulante na scol. E consecuencia di e decision aki ta cu alumnonan cu nan condicion compleho y pisa lo keda na nan mes scol cu e consecuensia cu no lo por yudanan adecuadamente y caminda e problemanan y retraso na scol lo bira mas grandi. Por mira esaki como negligencia. Ceramento di e dos klasnan tin como otro consecuencia cu e lista di espera pa ayudo lo bira mas largo. Tambe e alumnonan ta keda na nan scol cu tur consecuensia pa e desaroyo di e alumnonan aki, e otro alumnonan den e respectivo klas y e tareanan cu ta bira mas pisa pa e personal na scol.
- E Minister di educacion ta pone personal di MDC disponibel na e diferente directivanan escolar esta e fundacion di scolnan catolico di Aruba (SKOA) y Dienst Publieke Scholen (DPS). Banda di esaki den e dos reunionnan teni cu e personal na MDC no tabata mucho cla kico specificamente e plannan ta pa cu MDC, mirando e ceramento di e dos klasnan, y e falta di communicacion cu e personal, e Minister di educacion ta crea incertidumbre y inseguridad cerca un parti di e personal. Na nan banda tin miedo di perde nan trabao y ta haya nan obliga di bay busca trabao cu por brinda e seguridad.
- E personal cu ta bay, no ta bay haya remplazo p’e, cu consecuencianan negativo y banda di esey un adicion na e peso di trabao pa e personal cu ta keda. Tambe e funcionnan cardinal na MDC cu no lo tey mas ta trece acerca cu no por garantisa e servicionan cu te cu awor a duna, e ayudo na e alumnonan lo no ta suficiente y e lista di espera lo crece. Ehempel ta e falta awor di e terapeutanan y e profesional di conducta y siñamento di e centro di observacion, combina cu e falta di remplaso di e cuponan aki cu personal capacita. Sin e terapeutanan aki e alumnonan no lo haya e terapia necesario y imperativo cu e alumnonan aki tin mester di dje. Den e situacion aki personal di MDC ta haya nan mes obliga di no para responsabel pa e falta di servicio.
- Den e mocion nr. 34, d.d. 20 april 2018, presenta den un reunion publico di Parlamento, parlamentarionan a vocifera e preocupacionnan y a urgi Minister di educacion pa percura pa mehoracion di e capacidad y organisacion di MdC. Ademas a urgi Minister via di e mocion aki pa reuni cu e profesionalnan di MdC mas liher posibel pa delibera tocante e preocupacionnan. Lastimamente ainda e personal di MdC no a haya ningun reaccion di Minister, asina mes cu varios ocasion a solicita reunion cu participacion di SEPPA.
- Minister a anuncia su plannan pa bin cu teamnan di cuido (zorgteams) pa e fundacion di SKOA y DPS. En parte lo equipa e teamnan aki cu e personal di MdC. E plan aki pa bin cu teamnan di cuido ta contradictorio na locual e personal di MDC a haya conocemento di dje for di Expertise centrum di Boneiro (EOZ). Un presentacion organisa door di Minister di educacion na juni 2018 ultimo pa MDC, Directie Onderwijs Aruba, y Inspectie Onderwijs Aruba, a trata desaroyonan di Caribe Hulandes pa cu e cuido di alumnonan na scol. Den pasado Boneiro a traha cu teamnan di cuido cerca e directivanan di scolnan, pero e decentralisacion di e cuido pa alumnonan no tabata exitoso pa motibo di inefectividad y un insuficiencia di cuido di e calidad di e ayudo. For di 2011 Boneiro a hustamente cambia pa centralisacion di tur dunador di cuido den educacion na un centro, esta e EOZ. EOZ y MDC ta haci e mes trabao comparativamente. Locual ta duel e personal di MDC ta cu Minister no a keda pa e presentacion completo aki.
E pregunta ta keda, si Minister lo keda cu e mes opinion di bin cu e teamnan di cuido no obstante e experiencia di Boneiro. Banda di esaki e Minister no a duna claridad tocante e tareanan y responsabilidadnan di e teamnan di cuido di SKOA y DPS.
Un otro aspecto hopi relevante cu a sali for di e presentacion di EOZ ta cu apesar cu nan tin nan formacion laboral completa, ainda nan tin un lista di espera. E gobierno ta enfoca riba inverti den mas personal y e conocemento di e personal. EOZ tin na nan disposicion 10 specialista di conducta y siñamento (psicologo/ ortopedagogo) y 10 trahador social y asistente di investigacion pa 8 scol primario y secundario cu un cantidad total di ± 1100 alumno. Por menciona aserca cu nan tin e recursonan pa paga specialistanan di conducta y siñamento y logopedistanan priva, compara cu e situacion actual na MDC cu 6 specialista di conducta y siñamento pa 64 scol primaro cu un cantidad di mas di 11.000 alumno.
- E personal di MDC liga na SEPPA ta masha asombra di e expresionnan haci door di Minister di educacion tocante e autorizacion di psicologonan y ortopedagogonan di MDC, durante reunionnan y presentacionnan cu entre otro scolnan y otro stakeholdernan. E personal di MDC ta haya hopi pregunta tocante e expresionnan aki for di esnan den educacion. E expresionnan ta tocante e contenido di e trabao, e autorizacion y e competencia y habilidad di psicologonan y ortopedagogonan cu no ta cuadra cu realidad. Un di e expresionnan aki ta cu psicologonan y ortopedagogonan no por haci evaluacionnan y investigacionnan psicologico pasobra nan no tin e autorizasion pa haci esaki y cu e tendencia internacional lo ta cu no ta haci investigacion/ evaluacion di inteligencia mas. Esaki ta trece bruhamento inecesario den e tereno di educacion. Na MDC ta haci e evaluacionnan psicologico segun standardnan internacional di e profesion y si tin mester ta haci un investigacion di inteligencia cerca e alumno. Tambe psicologonan y ortopedagogonan na MDC tin e registracion di “Basisaantekening Diagnostiek NIP/NVO” cu ta un seyo di calidad y cu ta garantisa cu e psicologonan y ortopedagogonan tin e conocemento y experticio di psicodiagnostica. E mantencion di e calidad di e experticio ta den man di e director cu ta doctor (PHD) den psicologia clinico y ta cualifica pa diagnostica.
Pa motibo di e desplasamento di profesionalnan y e no remplasamento di nan, MDC no por ni garantisa ni percura pa duna servicio efectivo y di calidad.
Di e forma aki ta pone e alumnonan den un desbentaha caminda e mucha mester keda central. Muchanan cu problemanan di desaroyo of psicologico tin e derecho ariba e mihor cuido posibel manera ta claramente describi den e Tratado di Derecho di Mucha.
E personal di MDC afilia na sindicato SEPPA ta di opinion cu ta supremamente necesario pa remplasa e profesionalnan cu a bay, p’asina por duna e servicio efectivo y di calidad y pa por traha den un clima laboral mas agradabel. Di e forma aki e alumnonan cu mester di e cuido specifico na scolnan y na e Centro di observacion lo por haya e oportunidad di tin un miho futuro di educacion. Por ultimo ta bolbe urgi e Minister di educacion pa un reunion cu e profesionalnan di MdC pa por yega na un solucion satisfactorio pa tur esnan envolvi.
