Parlamentario Alan Howell, durante tratamento di presupuesto di DOW den sala di Parlamento a indica cu e ta hopi contento di mira un diferencia grandi den e corto tempo di existencia di Gabinete Wever-Croes.
“Nos no ta satisfecho totalmente ainda, pero nos ta hopi contento cu e trabounan cu e Minister di Infrastructura a bin ta haciendo y ta spera tambe cu e minister sigui den e mesun rumbo aki, cu e mesun gana pa trece e cambionan cu pa añanan no a mira”.
El a indica cu por a mira un cantidad di bouwvergunning cu a sali den ultimo lunanan y mirando esaki por hasta bisa cu nan ta mas cu loke a wordo otorga den e ultimo 8 añanan pasa. Esaki ta ilustra cu e maneho ta uno unda cu e ser humano berdaderamente ta central.
Continuando e parlamentario di POR a expresa cu pa hopi aña habitantenan tabata disgusta pa e forma cu a hiba e maneho pa loke ta bashamento di asfalt dilanti di nan cas. Hopi di nan hasta a cansa di tanto stof cu nan a come y a fada di pidi pa haya asfalt dilanti di nan cas of nan bario. Awo por mira cu e minister hunto cu DOW a cuminsa cu e proceso di asfalta e camindanan cu ta necesario. “E ta great pa mira cu e minister di DOW ta moviendo den diferente bario, pero ta mas great pa scucha y mira den diferente medio di comunicacion y medionan social, independiente di color politico di e persona, nan ta keda contento di mira un cambio y haya un alivio di comemento di stof den nan bario”.
Logicamente e movecion aki ta pone un presion grandi riba e minister y e departamento debi cu tur hende ta desea di haya asfalt den nan bario. A cuminsa cu barionan pabou di brug, pero Howell como habitante di pariba di brug, lo desea di mira masha lihe, mas pronto cu ta posibel, cu e bashamento di asfalt por cuminsa tuma lugar pariba di brug. Pesey el a puntra e minister ki dia e habitantenan di pariba lo por cuminsa wak y sinti e cambio aki den nan bario. Tambe lo desea di sa cual ta e barionan cu lo bin prome na remarke. E ta considera cu ta importante pa cuminsa na e barionan cu ta wardando pa mas cu 20 aña. Tin barionan cu a yega di manda carta pa minister anterior of a yega di haci peticion. Por ehempel barionan na Weg Seroe Preto, barionan na Brazil, Mabon, Rooi Master y Sabana Basora.
Durante contestacion Minister Otmar Oduber a confirma cu den luna di september lo cuminsa cu e parti di bashamento di asfalt pariba di brug y barionan y lo cuminsa den barionan manera Seroe Preto, Brazil y otronan pariba di brug.
