Na estadianan den sector horeca cu ta liber di sangura

Esaki ta di 4 aña consecutivo cu Departamento di Salud Publico ta organisa nan “mosquito controlled resort award ceremony”. Un ceremonia di reconocemento pa e esfuero y responsabilidad grandi cu un cantidad di resort y apartamento a logra cumpli cu ne durante ful aña 2017.

Como Departamento di Salud Publico nos ta conciente cu mantene e localidadnan aki liber di criadero di sangura no ta facil y cu eta rekeri tempo, esfuero y trabou den ekipo. Ta pesey mes cu e reconocemento aki ta na su lugar. Awe un total di 32 localidad a wordo reconoci, esaki ta representa un promedio di 50% di tur e estadianan na Aruba. Hunto cu ATA y AHATA Departamento di Salud Publico lo bay traha mas riba programanan di concientisacion pa e resort y apartamentonan pa asina motiva tur pa ta mas activo den detecta y deshaci di criadero. Departamento di Salud ta gradici ATA y AHATA pa e bon colaboracion aki.

Dia 2 di maart lo tin un workshop pa e resort y apartamentonan cu no a logra ta completamente liber di criadero di sangura durante e controlnan di GKMB pa aña
2017. Den e workshop aki e expertonan di GKMB lo bay duna tipsnan con pa spot potencial criaderonan pero tambe lo enfoca riba e importancia pa tin un resort liber di criadero di sangura. Esaki no solamente pa proteha e turista pero pa proteha nos comunidad tambe. Malesanan transmiti pa sangura cu tin na Aruba caba nos conosenan pero otronan manera Gele Koorts cu nos no tin na Aruba por wordo importa door di un turista y transmiti pa nos comunidad door di un sangura.