Despues di morto di Maria “Mai” Anette Maduro-Lampe na edad di 109 aña, e ciudadano mas bieu di nos isla awor ta keto bay un hende muhe. Ta trata aki di Mary Benjamin, naci dia 14 di Juli 1910 na Sint Kitts. E tin 108 aña, ta completamente na su tino, ta move independiente. E ta bibando cu su unico yiu na bida, esta Joseph Henderson.
Mester menciona cu di acuerdo cu cifranan oficial, na Aruba na e momentonan aki tin 12 ciudadano cu tin 100 aña of mas. E hende muhe cu e edad mas avansa tin 108 aña y e hende homber cu ta bibando mas tin 104 aña di edad. Na e momento aki tin 5 ciudadano cu 99 aña, pues cu den aña 2019 lo cumpli 100 aña di edad. Di e 12 personanan cu ta riba 100 aña na Aruba, 4 ta hende homber y 8 ta hende muhe!
Ayera Maria “Mai” Maduro a fayece na edad di 109 aña. E ta e prome y unico ciudadano cu a yega di alcansa e bunita edad aki na Aruba. E ta naci dia 26 di Mei 1909, tabata casa cu Mauricio Maduro y nan a haya diescinco yiu, di cual 1 so a fayece algun tempo pasa. Anette Maduro-Lampe tin 5 generacion su tras, consistiendo di 15 yiu, 50 nieto, 79 bisanieto y 60 tataranieto.
Mary Benjamin ta e ciudadano mas bieu awor cu 108 aña di edad
Pa loke ta e ciudadano mas bieu awor, esta Mary Benjamin, nan ta 4 ruman di cual 2 a bin Aruba. Mary mes a haya dos yiu, un yiu muhe y un yiu homber. E yiu muhe a fayece caba. E ta bibando bon, completamente na su tino, e ta cana cu un baston si y ta sufri poco di reuma. El a traha hopi aña na den Laundry, na De Wit Stores pero mas bien a strica pa hende durante hopi aña, entre otro pa famia Vrieswijk, Henriquez, Bareño y Ho Kan You. El a yega Aruba dor di a bin busca su ruman, pero asina e mes a keda y awe ta e ciudadano cu e edad mas halto riba nos isla.
