Multa di mas cu 2 miyon riba cabes di Minister Dangui Oduber

Pa cada biaha cu Minister Dangui Oduber stroba Fundacion Lotto pa Deporte di funciona normalmente, dor di pidi informacion, duna instruccion of te hasta atacanan den media, e lo mester laga 2 mil cinco shen florin te na un maximo di 2.5 miyon florin. Hues a impone un “dwangsom” contra e mandatario debi cu e no ta respetando e sentencia di Hues di februari ultimo. Normalmente Corte no sa impone multa contra Gobierno, saliendo for di e punto di bista cu Ministernan ta respeta nos estado di derecho. Awor, den apenas 7 luna di gobernacion, Corte a nota un tendencia peligroso, pa cual a cuminsa tuma accion!

Fundacion Stichting Lotto pa Deporte, representa pa su Hunta di Supervision, esta Silvio Janga (Presidente), Benvinda Sousa, Antonius Kamperveen, Flavio Faneyte y Elias Kock y representa legalmente pa abogado mr. Huiskens a entama un caso contra Gobierno di Aruba, specificamente Minister Dangui Oduber, kende tabata representa pa abogado mr. Anthony Ruiz di e Bufete di Croes, Wever & Tchong.

Dia 4 di mei 2018 a trata e caso aki den Corte. Ta referi na e sentencia di e caso sumario di dia 7 di februari 2018, unda cu e Hues a instrui Gobierno pa laga e directiva di Lotto sigui traha, cu tur nan autoridad, te ora cu e caso den “Bodemprocedure” keda cla. Tambe Hues a suspende e decision di Minister Dangui Oduber pa nombra un lista di miembronan nobo, entre otro casa di un Minister, den e directiva “nobo” di FLPD. E tempo ey Hues no a impone un “dwangsom” riba Gobierno pasobra lo a spera cu Minister Dangui Oduber ta respeta sentencia di Corte.

Sinembargo, despues di e sentencia e mandatario a manda un cantidad di carta cu un sin fin di peticionnan na e fundacion. No solamente peticion, sino den algun ocasion hasta dunando instruccionnan.

Cu e realidad aki riba mesa, e Fundacion a opta pa regresa Corte pa enfatisa na Hues cu Minister Dangui Oduber no ta teniendo su mes na e sentencia y ta strobando nan di opera. Tur esey mientras cu den medionan di comunicacion casi diariamente ta menasa cu lanta otro fundacion, ta ataca e directiva personalmente y ta haci tur posibel pa hinca e loteria den un luz negativo.

Corte den su evaluacion ta tene na consideracion si Gobierno ta cumpliendo cu e sentencia dor di suspende nan decision di dia 3 di januari 2018. Esey partidonan ta haya cu Gobierno ta cumpliendo. Tampoco e caso tin di haber cu si e sentencia di dia 7 di februari 2018 ta bon of no, pasobra esey mester atende den un caso di apelacion. E caso specifico aki ta pa contesta e pregunta si FLPD tin un interes pa impone un “dwangsom” riba e sentencia di dia 7 di februari contra Gobierno di Aruba, den cual a instrui nan pa laga e directiva funciona trankil. Sinembargo, tur cos ta mustra cu esey no ta e caso.

Den su sentencia, Hues mr. W. Noordhuizen a ordena Gobierno di Aruba (Minister Dangui Oduber) pa atene su mes na e sentencia di dia 7 di februari 2018, pa laga e hunta di directiva funciona sin ningun tipo di estorbo, te ora e caso keda cla den “Bodemprocedure”. E biaha aki si Hues a impone un multa (dwangsom) di Afl. 2500,= pa cada biaha y/of cada dia of parti di dia cu Gobierno no cumpli cu e sentencia, te cu un maximo di Afl. 2.500.000,= (2.5 miyon florin). A sentencia Gobierno pa paga gastonan di e caso y a declara e sentencia aki como “uitvoerbaar bij voorraad”.

Sentencia Caso Sumario FLPD vs Minister Dangui Oduber – Mei 2018 Sentencia Caso Sumario FLPD vs Minister Dangui Oduber – Mei 2018