Muher Mericano deteni relaciona cu mensahe di Bom cu a paraliza aviacion na Aruba diahuebs

Dos muher Mericano a keda deteni diahuebs despues cu e vuelo di Southwest a baha na Aruba. E avion tabata yen di pasahero di Aruba y turista cu tabata biniendo for di Orlando.

E capitan di e avion a haya un mensahe den banjo cu a capta atencion y mesora a bati alarma.E papel cu mensahe di bom riba dje tabata motibo suficiente pa tuma e cos na serio y avisa autoridad local di e caso aki. Na yegada di e avion ya caba e area rond di e aeropuerto a wordo sigura. Na Airport mes autoridad a prepara tambe pa pone tur hende den un area pa asina e investigacion wordo haci. Den e avion tabata tin pasaheronan local kendenan autoridad local  a acerca. A papia cu pasaheronan local cu tabata cerca di banjo. E mensahe a wordo haya den e banjo parti dilanti y esey ta e banjo cu e capitan a bay usa y topa cu e mensahe. Durante investigacion a logra pone man riba dos hende muher Mericano cu tabata abordo. Un team di recherché a cuminsa cu e investigacion. E proceso di sondea den e avion tambe a tuma lugar.

Aeropuerto a keda oranan sera y varios otro avion mester a wordo desvia mientras cu un cantidad di pasahero a perde nan coneccion. Ta algo serio loke a sosode. No a topa nada robez den e avion finalmente. E listramento riba e maletanan a bay positivamente. No a topa cu nada stranjo. Algun pasahero cu a yega den e avion si tabata disgusta pa falta di informacion. Ta ora cu a mira media local, nan a tuma nota di loke ta pasando. Ningun ora e aerolinea a notificanan kiko realmente tabata pasando. E dos sospechosonan femenino a wordo interoga pa oranan largo na aeropuerto. For di merdia te cu anochi e interogacion a tuma lugar. Na final tur dos sospechoso a keda sera. Ambos a wordo mustra riba su derechonan. Den un forma tactico autoridad di recherché y grensbewaking a logra yega na e dos prome sospechosonan y djey ambos a keda. Informacion cu nos tin ta cu a haya e pen cu a pone e nota di bom den poder di un sospechoso. Esaki ta un prueba importante pa condena e sospechoso aki. Loke a pasa diahuebs merdia na Aruba por tin consecuencia serio pa e sospechoso aki. Ta hopi danjo a causa y e chens ta grandi cu por haya nan cu diferente demanda.

Nan por haya demanda den corte na Aruba unda tin nuebe anja a colga riba nan cabez, nan por haya un demanda di aeropuerto di Aruba pa e perdida hiba, tambe e por haya demanda di aerolineanan cu a wordo perhudica pa su actuacion.. Mescos na Merca tin cos ta spera ambos pa loke cu nan lo a haci. Si ta un joke of no, esaki tin su consecuencia. Autoridad local a tuma e cos masha na serio y a considera e caso aki como uno dirigi riba terorismo. E sospechosonan  den oranan banda di 9or di anochi a wordo hiba diferente warda unda a pasa e prome anochi den celnan di Polis na Aruba. E personal di K-9 y tambe Flex Team tabata presente anochi na airport ora cu otro vuelonan di Merca tambe a baha. Nan presencia tabata pa duna un ambiente di mas seguridad na esnan cu tabata yegando Aruba. Nan tin e cacho prepara pa explosivo y droga y e tambe tabata den accion diahuebs anochi.