Awe 18 di yüni 2018 un delegashon di Nashonnan Uní a reuní ku promé minister Rhuggenaath pa tende kon ta pará ku e metanan di gobièrnu pa kombatí entre otro pobresa, kaba ku hamber i stimulá edukashon i ekonomia. E delegashon ku ta na Kòrsou e siman aki lo yuda Gobièrnu pa pone prioridat na tur e plannan ku tin kla.
E delegashon ta konsistí for di personanan di diferente agensia di Nashon Uní. Nan tin eksperensia for di nan trabounan den nan pais i sa ku kua solushon nan a por trese pa kualke situashon ku presentá. Di otro banda nan a mira desaroyo den nan pais i ta kla pa duna konseho. E delegashon di Nashon Uní ta usa e método MAPS, ku ta para pa ‘Mainstreaming, Acceleration and Policy Support’. Esaki mester pone ku Kòrsou lo kumpli ku e Sustainable Development Goals di Nashonnan Uní.
Sustainable Development Goals (SDG’s) tin komo meta logra desaroyo duradero di tur pais na mundu. Esaki entre otro dor di realisá metanan ku ta resolvé loke ta kousa pobresa. E intenshon di Nashonnan Uni ta ku pa aña 2030 paisnan logra realisá e kombinashon di metanan aki. Kòrsou su akuerdo di gobernashon ta basa pa un gran parti riba e lokual Nashonnan Uní a pone komo base pa por logra desaroyo duradero. E SDG’s di Nashonnan Uní ta forma un kuadro riba kual por guia implementashon di maneho eksistente di un pais i formulá maneho nobo.
E mishon lo kubrí entre otro kon pa yega na aselerashon riba vários área di prioridat manera pobresa, kresementu ekonómiko, enseñansa, aspektonan sosial i di salú i tambe durabilidat (enfoke riba medio ambiente i energia moderno i duradero). Tambe lo analisá i tene konsultanan riba aspektonan di kordinashon i institushonalisashon, kon pa reforsá maneranan pa kolektá data i lo eksplorá posibilidatnan pa finansiamentu den kuadro di implementashon di e metanan di desaroyo duradero.
E delegashon di Nashonnan Uní lo konsistí di entre otro ekspertonan di UNDP (e programa di desaroyo di Nashonnan Uní), United Nations Population Fund, International Labour Organization (ILO), United Nations Children’s Fund (UNICEF) i tambe Economic Commission for Latin-America and the Caribbean (ECLAC).
Durante e mishon lo tene vários konsultá ku entre Konseho di Minister, representantenan di gobièrnu (tur nuebe ministerio i tambe direktornan i sekretarionan general), representantenan di sektor privá i tambe di sindikatonan, NGO’s, Ofisina Sentral di Statistik, Kontrolaria General, Banko Sentral di Kòrsou i St. Maarten, sektor akadémiko i tambe hóbennan. Ademas lo duna training den kuadro di e metodologia di Nashonnan Uní pa ku ‘Acceleration’ i ‘Theory of Change’ (e teoria di kambio), kual lo yuda pa definí i prioritisá intervenshonnan pa yega na ehekushon di maneho di forma mas efektivo i atendé ku opstákulonan. Na kabamentu di e mishon, e tim di Nashonnan Uní lo presentá e resultadonan inisial di e konsultanan i análisis na gobièrnu i despues ora konkluí e RoadMap definitivo lo presentá esaki mas amplio na tur ministerio i grupo ku a keda konsultá i asina duna empuhe na implementashon di maneho i plannan na Kòrsou.
