Minister Xiomara Ruiz ta duna reconocemento na Lurena Schewengle

Diasabra dia 10 di maart ultimo Comision Celebracion Dianan Nacional a organisa un anochi cultural cu a hiba e nomber Explocion Cultural, caminda a duna oportunidad na hobennan pa trece nan talaneto dilanti den forma di baile, poesia y canto. Un bunita presentacion.

Durante e anochi aki Minister di Finansa, Asuntonan Economico y Cultura Sra. mr. Xiomara Ruiz-Maduro a duna un bunita reconocimento na Sra. Lurena Schwengle pa su gran aporte na promocion y preservacion di musica Arubano.

Señora Lurena Schwengle ta bini for di e bario di Savaneta. Cu 8 aña ya e tabata por a toca su cuarta y tabata canta den tur actividad di scol. Lurena a tuma les di canto cerca juffrouw Lila Richardson. El  a participa den diferente festivalnan di canto infantil. Pa hopi aña el a forma parti di agrupacionnan di fin di aña tocando instrumentonan ritmico.

 

Na aña 1990 e la descubri su talento nobo y aki tabata e momento cu e la compone su prome cancion. For di e tempo ey te cu awor Lurena a compone un cantidad di cancionan na Papiamento, den diferente genero,  pa diferente solista y agrupacionan musical conoci aki na Aruba.

Den nos bunita festival “Un canto na Aruba su himno y bandera” Lurena tin varios titulo riba su nomber, tanto den categoria infantil/hubenil y adulto. Lurena a logra e titulo maximo den nos festival categoria adulto como “Compositor Ganador” ya pa 4 biaha caba. Na 2009 “Mi ta bo yiu” cu Darien Kastaneer, na 2010 “Mil y un recuerdo” cu Sharon Rose, na 2011 “Aki ta mi cas” cu Lily Rodgers y na 2014 “Fiel na mi Aruba” cu Jeanedy Semeleer. Na 2 ocacion Lurena a participa den “Festival Ban Kanta Nos Boneiru” y aki el a bay cu e premio Compositor Ganador na 2015 y na 2016 e la sali prome finalista.