Minister di Finansas, Asuntonan Economico y Cultura mr. Xiomara Ruiz-Maduro , ta anuncia e prijsnan di benta pa combustibel entrante diarazon 14 februari 2018. Esaki ta basa riba e prijsnan promedio di Platts US Marketscan (Gulf Coast) pa e di 1 te cu 31 di januari 2018.
Segun informacion ricibi di Departamento di Asuntonan Economico, Comercio y industria, mandatario ta trece un splicacion di e aumento di prijsnan di productonan petrolero pa 14 februari 2018, na razon di publicacionnan di Platts US Marketscan e prijsnan di productonan petrolero a aumenta cu 7,5 cent per liter pa gasoline y 6,4 cent per liter pa diesel. No tabatin cambio den ningun di e otro componentenan pa calculacion di e prijsnan maximo.
Adaptacion di calculacion di prijsnan maximo pa productonan petrolero ta sosode tur di dos diaranzon di luna. E calculacion di prijsnan maximo pa productonan petrolero ta sosode a base di informacion obteni di prijsnan di Platts US Marketscan, cual ta a base di prijsnan di productonan petrolero refina, anota internacionalmente.
A base di Marketscan ta tuma un averahe di e prijsnan di e dia ey, pa despues na final di luna saca e averahe mensual. Pa calculacion di prijsnan maximo pa productonan petrolero di un luna, ta haci uso di e averahe di prijsnan di e luna anterior.
E componentenann pa calculacion di e prijsnan pa productonan petrolero ta e averahe di prijsnan mensual, gastonan di transporte, seguro, perdida pa medio di verdamping, accijns, margen di mayorista y detayista, BBO y BAZV. Tambe tin un componente di subsidio pa mantene e prijs di LPG (gas pa cushina) abao.
Casi tur componente den e structura di prijs ta absoluto. E unico componentenan cu ta varia tur luna ta e prijsnan y e BBO/BAZV.
