Minister Plenipotenciario di St. Maarten a bishita su colega di Aruba

Minister Plenipotenciario di St. Maarten Jorien Wuite a haci un bishita oficial cerca Minister Plenipotenciario di Aruba Guillfred Besaril. Sra. Wuite recientemente a keda nombra como representante di St. Maarten na Hulanda.

Sra. Wuite a sigi su estudio na Erasmus Universiteit na Rotterdam y e tin un Master Degree den Health Care Management. Despues di su estudio sra. Wuite a traha como Management Consultant pa KVA Group na Hulanda.

Na 1997 Jorien Wuite a cuminsa traha como director Sector Health Care Affairs na St. Maarten.  Na 2010 ela keda nombra como Chief of Staff (Secretary General) na e Ministerio di Salud Publico, Desaroyo Social y Labor. Despues na 2014 sra. Wuite a ocupa e mesun funcion aki na e Ministerio di Enseñansa, Cultura, Hubentud y Deporte.

Na januari di e aña aki Jorien Wuite a asumi un posicion politico como Minister di Enseñansa, Cultura, Hubentud y Deporte.

Como recuerdo di e bishita Minister Plenipotenciario Guillfred Besaril a haci entrega na sra. Wuite un ehemplar di e buki “Aruba” di Marco Borsato, un publicacion na ocacion di e exposicion “Gezichten van Aruba”.