Vice Prome Minister di Gobierno di Aruba, Otmar Oduber, Secretario di Estado di Infrastructura y Waterstaat di Hulanda, Stientje van Veldhoven y Presidente di VNG, Jan van Zanen a forma e delegacion di Reino Hulandes cu a participa na e asina yama “High Level Political Forum” di Nacionnan Uni na New York.
Tema di e reunion ta Sustainable Development Goals formula na aña 2015 den e contexto di Nacionnan Uni pa eradica pobresa, desigualdad y cambio climatico. A elabora specificamente riba entre otro e disponibilidad di awa, sanidad y energia pa un y tur, produccion y consumo sostenibel y e proteccion di ecosistemanan.
E metanan di desaroyonan sostenibel a wordo acepta pa tur cuater pais den Reino, pero no a haci’e realmente un asunto di Reino. Por ehempel Aruba, Corsou, Sint. Maarten y Hulanda cada un tin su propio agenda y vision riba Sustainable Development Goals.
