Desde oranan di marduga, Minister Otmar Oduber a confronta dolornan fuerte, pa cual el a bay Spoed Eisende Hulp na Hospital. Ey a constata cu e dolor tabata procedente di piedra den su riñon. Dokter a opta pa interna e mandatario pa observacion, probablemente pa evalua si lo oper’e y saca e piedranan. E mandatario a expresa palabranan di gradicimento na tur cu ta preocupa cu su salud y na e personal atento di Hospital. “Mi ta spera di ta pronto bek riba pia”, asina el a bisa riba red social siendo interna den Hospital.
Desde November 2017, Otmar Oduber ta ocupando e puesto di Minister di Desaroyo Teritorial, Infrastructura y Integracion.
Historia politico di Otmar Oduber
Otmar Oduber a aparece pa prome bez riba lista politico na aña 1997 cu partido AVP y na december 2016 a funda su mesun partido, Pueblo Orguyoso y Respeta (POR). Den nan prome eleccion na aña 2017, combinando forsa entre Otmar Oduber (AVP), Marisol Lopez (MEP-AVP) y Andin Bikker (PDR), e partido di 29 candidato a logra no mas di 5531 voto. 
Votonan individual di Otmar Oduber
- Eleccion 1997 – AVP – 555 voto ↕️
- Eleccion 2001 – AVP – 313 voto ⬇️
- Eleccion 2005 – AVP – 918 voto ⬆️
- Eleccion 2009 – AVP – 1647 voto ⬆️
- Eleccion 2013 – AVP – 4008 voto ⬆️
- Eleccion 2017 – POR – 1808 voto ⬇️
