Aunke cu dia 16 di mei ultimo, ora cu Minister Dangui Oduber a sufri su di tres derota sigui contra Fundacion Lotto pa Deporte den Corte, el a bisa cu un tono rabia cu e lo apela e decision di Hues, toch na final a opta pa no haci’e. No ta conoci si ta su mes a “give up” e bataya of ta su abogado lo a bis’e cu e lo no kier bay bolbe perde den Corte. E tres simannan pa e apela e caso a transcuri, pues e sentencia di un “dwangsom” te cu 2.5 miyon florin riba su cabes si e sigui purba mete of stroba e directiva di traha of ataca nan den prensa, ta keda vigente te ora e caso bin dilanti den “bodemprocedure”.
Normalmente Corte no sa impone multa contra Gobierno, saliendo for di e punto di bista cu Ministernan ta respeta nos estado di derecho. Awor, den apenas 7 luna di gobernacion, Corte a nota un tendencia peligroso, pa cual a cuminsa tuma accion! Minister Dangui Oduber ta e prome mandatario den e Gabinete aki cu a haya semehante “castigo” di Corte, probablemente pa su declaracion soberbe contra un Magistrado, den cual a acusa Hues di ta “politiek verziekt”.
Desde inicio di e periodo di gobernacion e mandatario ta haciendo tur lo posibel pa yega na Fundacion Lotto pa Deporte. A purba nombra un directiva nobo, pero Hues a anula su decision. Despues a sigui purba mete dor di duna instruccion y purba persigui miembronan di directiva, gerencia y hasta proveedornan di e fundacion y atrobe Hues a strob’e. Corte a subraya cu e fundacion no ta un departamento di Gobierno, pues ta traha independiente di Gobierno.
Su plan na inicio tabata pa core cu e Hunta di Supervision, aunke nunca a sinta cu nan pa splica su vision den deporte y unda e kier hiba e loteria. Tabata bisto cu despues a opta pa purba persigui e Director di Lotto tambe, esta mr. Di-Stefano Wernet RA, pero den e intento ey tampoco e no a logra ainda despues di tanto luna.
Minister Dangui Oduber ta un di e mandatarionan cu a topa basta problema pa remplasa miembronan den Hunta di Supervision resortando bou di dje, manera ATA, SVB, AZV, FFD y FLPD. Por menciona cu den Hospital mes, unda e tin derecho pa nombra 2 miembro, te awe, despuea di 7 luna di tempo, ainda e no a haci cambio. Como tal Gino Goeloe y Edwin Tromp, ambos nombra dor di Minister Dr. Alex Schwengle, ainda ta den directiva. Es mas, Goeloe a pasa di ta representante di Gobierno pa representante di Hospital mes den e Raad van Toezicht y miembronan a vota pa e mes sigui como Presidente tambe.
