Durante su estadia na Hulanda, Minister di Enseñansa, Siensia, Kultura i Deporte, sra. drs. Marilyn Alcalá-Wallé huntu ku Minister Plenipotensiario sr. Anthony Begina a reuní ku representantenan di Missing Chapter Foundation, sra. Marloes van der Have i sra. Zita Luna.
E dos representantenan aki a bini na nòmber di Prinsesa Laurentien van Oranje, ku ta fundador di e organisashon.
Meta di Missing Chapter Foundation ta pa stimulá inklushon di muchanan i hóbennan den forma di diálogo den tomo di desishon ora ta trata di preguntanan klave den komunidat ku tin di haber ku nos presente i futuro. Punto di salida ta ku muchanan ta futuro di mañan i nan ta bai manehá i goberná nos pais, es mas nos mundu.
Pa e motibu aki ta importante pa skucha perspektivanan di nos futuro generashon den un ambiente sano di diálogo. Muchanan i hóbennan por kontribuí ku preguntanan, ideanan, posibel solushonnan kreativo ku ta duna guia na e proseso di tomo di desishon. Missing Chapter Foundation ta intermediá ku nan ekspertisio entre muchanan, hóbennan i adultonan. Nan ta duna sosten na skolnan, empresanan i organisashonnan sosial na momentu ku esakinan ta deseá di inkluí muchanan i hóbennan den desishonnan.
Minister Marilyn Alcalá-Wallé a sinta huntu ku Missing Chapter Foundation ku ya pa algun tempu ta aktivo na Kòrsou, pa evaluá den kua forma gobièrnu por duna mihó kontenido na inklushon di opinion di muchanan den nos komunidat, kual ta un derechi fundamental. Minister Marilyn Alcalá-Wallé a duna di konosé ku e ta sostené e trabounan ku Missing Chapter Foundation ta ehersé na Kòrsou.
Pa medio di inklushon di hubentut den diálogo, e hubentut ta kontribuí na edifikashon di nos pais (nation-building). Tambe Minister Marilyn Alcalá-Wallé ta bai buska plataformanan denter di nos skolnan pa inkluí muchanan i hóbennan, pa por duna nan keho i konsehonan pa asina drecha maneho di nos skolnan i hasi enseñansa mas efektivo i plasentero pa nos muchanan.
