Minister di Asuntonan Exterior di Reino, Stef Blok, ta mira “momentaneamente” ningun rason pa no acepta nombramento di parti di Venezuela di e ex general Carlos Mata Figueroa pa fungi como Consul general na Aruba.
E Minister a responde pregunta nan por escrito di dos miembronan di Tweede Kamer Raymond de Roon y Machiel de Graaf (ambos di PVV). Nan ta haya cu Hulanda no mester permiti acceso na ningun diplomatico stranhero di mal reputacion. Mata Figueroa tabata Minister di Defensa den Gobierno di e ex presidente Hugo Chavez. Tambe e ta wordo asocia cu e trafico internacional di cocaina.
“E acuerdonan di e tratado pa acepta diplomaticonan stranhero ta diferi na diferente posicion, por ehempel embahador, consul y otro personal diplomatico. Cu bista na e relacionnan internacional efectivo, ta habitual cu e estado receptor ta rechasa un solicitud pa rasonnan apremiante. Esaki ta tambe e maneho Hulandes,” segun Blok.
E Minister sa cu na e momento aki no tin ningun indicacion – manera un condena pa hechonan castigabel serio – cu por stroba e acceso di Mata Figueroa. Segun e, e Venezolano no ta aparece riba e lista di Specially Designated Nationals and Blocked Persons di e Departamento di Tesoreria di Merca.
