E acusado Rafael de los Santos-Lantigua, miho conoci como “Antonio”, naci dia 10 di Mei 1967 na Santo Domingo, Republica Dominicana y biba na Pos Chikito, a sali algun luna mas trempan for di KIA, debi na un fout. Asina Minister di Husticia y Migracion, mr. Andin Bikker, a admiti ayera durante un conferencia di prensa. E ta asumi e responsabilidad politico, aunke e ta culpa un trahado di KIA pa e eror aki.
Manera ta conoci, e homber aki a bay cera na aña 2015 pa 8 dia den aresto preventivo pa a mishi cu un mucha muhe di 13 aña di edad. Un aña despues, na October 2016, Polis a gare banda di Sero Crystal cu e mesun mucha muhe aki, net e tabata cla pa tene relacion sexual cune. A start un persecucion y Polis a bahe sunu for di auto y detene.
Dia 16 di februari 2017, Hues a sentenci’e na 3 aña y 6 luna di prizon, pasobra ta haya legalmente proba intento di violacion di un menor di edad. E pruebanan di Fiscal no tabata suficiente pa condena e pedofil na Abuso sexual pasobra no por a prueba penetracion.
Ley ta bisa cu pa intento di violacion por cera un acusado pa 2 aña, pero Hues ta sinti cu tabatin circunstancianan adicional, por ehempel cu 1 aña prome a purba caba, cu a pone cu el a hisa e castigo na casi dobel di loke ta indica.
Di acuerdo cu e sentencia di Corte den Prome Instancia, e mester a sali na cuminsamento di otro aña. Sinembargo, dor cu KIA ta yen, ta laga e presonan cu nan fecha pa sali ta cerca, sali adelanta. Tene cuenta cu di acuerdo cu nos leynan, ta sinta 2/3 parti di castigo y ta sali 1/3 prome cu tempo.
Di acuerdo cu Minister Andin Bikker, e empleado di KIA cu ta atende e asunto aki ta cu vakantie y e reemplasante no tabata sa di e maneho cu presonan den caso di abuso sexual no ta sali prome cu tempo. E mandatario a subraya sinembargo cu den ley no ta haci distincion, tur hende tin derecho di sali prome cu ora na momento cu tin over populacion den prizon.
El a bisa di lo manda un proposicion pa cambia ley pa regula e asunto di presonan cu ta sali prome cu ora for di prizon debi cu celnan ta yen. E lo kier introduci tambe e sistema di enkelband pa presonan cu por bay cas trempan y haci uzo di e opcion di “huisarest” y haci nan cas un prizon. Mester caba di regula e ley ey tambe pa haci e opcion aki posibel.
