Diahuebs dia 17 di mei ultimo Gabinete di minister Plenipotenciario na Hulanda (Arubahuis) conhuntamente cu ATA Europe, Phryme Magazine y Stichting Kompas for Students a lansa un campaña special pa studiantenan di Aruba na Hulanda.
E campaña ta titula “Advice future students and help promote Aruba – film, send and win!”. E concepto di e campaña a bin for di e vision pa Arubahuis conhuntamente cu partners y nos propio studiantenan na Hulanda hunga un rol mas grandi y activo pa cu e preparacion y sosten na futuro studiantenan di Aruba. Hunto cu esey e tin como obhetivo pa nos studiantenan como embahadornan di Aruba na Hulanda yuda cu e promocion di nos isla. E metanan principal tras di e campaña ta pa eleva e envolvimento di nos studiantenan di Aruba na Hulanda, genera contenido relevante cu por uza durante encuentronan informativo pa studiante, crea un plataforma digital di informacion, y genera un grupo potencial di studiantenan cu lo por fungi como “student-ambassadors” y “Aruba-ambassadors”. Minister Besaril ta convenci cu nos mester optimalisa e preparacion y sosten na nos futuro studiantenan. Segun e mandatario “Nos mester inverti mas den preparacion paso un miho preparacion ta traduci den un miho rendimento”. 
Cu e iniciativa aki Arubahuis y e partners kier reconoce e potencial grandi cu tin entre nos studiantenan di Aruba na madre patria. Nos tin actualmente casi 2000 studiante di Aruba na Hulanda riba diferente nivel MBO, HBO y WO sea cu Arubalening of sin Arubalening. Cada un cu nan mesun storia, nan mesun experencia, nan mesun creatividad y nan mesun network. “E ta un potencial grandi cu lo por contribui na un manera positivo na e preparacion di nos futuro studiantenan y na promocion di nos pais” asina Minister Besaril ta enfatisa. Pa por participa na e campaña, e studiante mester contesta dos pregunta via di un mensahe di video: Kico ta bo miho conseho pa futuro studiantenan y kico ta bo experencia unico cu bo lo uza pa promove Aruba? E concepto ta uno di studiante pa studiante mirando cu ta reconoce e importancia di peer-to-peer ora di comparti informacion relevante y cu ta captiva atencion di hobennan. 
Pa e campaña a identifica dos organisacion di hoben studiante como partners cu actualmente ta activo cu iniciativanan sumamente positivo. Ta trata aki di Phryme Magazine cu desde aña pasa a lansa un plataforma digital den forma di un revista cu ta ilustra nos hobennan studiante di Aruba den exterior y e otro partner ta Kompas for Students cu desde aña pasa a inicia cu nan proyecto unda cu ta ofrece workshops di preparacion na Aruba pa nos hobennan prome cu nan bin studia Hulanda. Hunto cu ATA Europe e hobennan di Phryme Magazine y Kompas for Students a resulta di ta e partners perfecto pa e proyecto aki y Arubahuis ta contento di por colabora cu nan na beneficio di nos studiantenan di Aruba.
Pa e ocasion special di e lansamento di e campaña, e partners a organisa un launch event na Arubahuis unda cu tabata tin diferente organisacion di studiante presente. Entre nan ROCAS Rotterdam, POC Den Haag, Delft y Leiden, ABC Compas y HAN Huntu. Durante di e launch event cada partner a elabora riba nan vision y contribucion na e campaña y na final di e evento a formalisa e cooperacion unda cu e partners a firma un MOU. Tambe a comparti e poster y e video promocional di e campaña cu tur esnan presente.
Minister Besaril y e demas partners ta invita tur studiante di Aruba na Hulanda pa participa na e campaña aki cu por cierto tin premionan atractivo pa e ganadornan. E studiante cu e mihor video ta gana un pasashi ida y buelta di Amsterdam pa Aruba. Pa mas informacion di e campaña por bishita www.arubahuis.nl/students2018
