Prome cu a subi avion pa hiba cargamento di productonan basico y bin bek cu Arubianonan pega na St. Maarten, Minister President Mike Eman y Minister Mike de Meza a reuni cu representantenan di e comunidad di St. Maarten na Aruba. Den e encuentro, e delegacion a comparti nan preocupacion grandi pa nan famia y sernan keri, pa e falta di noticia y pa e gravedad di e informacion cu ta logra yega. Esaki y e sinti di solidaridad ta loke a motiva Gabinete Mike Eman II pa for di prome instante canalisa esfuersonan di ayuda humanitario pa cu nos isla ruman den Reino Hulandes.
Premier Eman ta combenci cu, dor di ta presente, ademas di demostra e solidaridad Arubiano cu e pueblo di St. Maarten, lo por reeestablece comunicacionan importante entre un gobierno cu otro y asina delinea un plan di ayudo mas acerta. Un avion chikito cu Premier Eman y Comision di Calamidad a sali ayeratardi for di termina di Aviacion General; mientras cu un par di ora mas laat, a sali un avion di PAWA Airlines solamente cu Minister de Meza y cargamento di productonan di prome necesidad. E intencion ta pa bin bek cu e avion yen di Arubiano cu ta desea di regresa nos isla.
“E experiencia tabata traumatico, manera nos por a compronde. E daño ta grandi y e caminda pa recuperacion lo ta uno hopi dificil y nos mester t’ey pa nos isla ruman di St. Maarten y pa e pueblo di St. Maarten,” tabata e palabra di Premier Eman. El a pone enfasis riba e relacion di Aruba y St. Maarten dor di hopi famia en comun, mayoria di nan cu ta biba na San Nicolas pa cual motibo su colega di Mike de Meza a sinti necesidad pa bay hunto.
Asina ta recoge e necesidad di pueblo y bin bek papia cu e pueblo Arubiano cu tin conexion cu St. Maarten, duna nan e ultimo noticia cu no ta hayando suficiente y trece mas claridad di e situacion. “Ta bon pa nos mes bay wak, nos mes haci e inventario tambe y haci e compromiso di con nos por bay yuda St. Maarten den e simannan cu ta bin,” asina e mandatario a finalisa bisando.
Ta conta riba e ayudo di Cuerpo Policial y Cruz Cora Aruba den e seleccion di persona cu ta aborda e vuelo aki, mientras cu den transcurso di diaranson y resto di siman lo tin mas vuelo programa. Adicional na esaki, Cruz Cora di St. Maarten a haci un peticion na Aruba pa evalua e posibilidad di ricibi un cantidad determina di famia cu no ta Arubiano, temporalmente. Ta trata di famianan cu a keda sin dak y muchanan cu no por bay scol. E bishita di e mandatarionan lo sirbi pa tin un bista mas cla y completo cu cual por bin bek Aruba y haci e apelacion riba comunidad y preparacion necesario pa hospeda nan.
