Cu 603 di e 604 votonan valido, Asamblea Nacional di Cuba a eligi e prome Vice Presidente Cubano, Miguel Diaz-Canel, como sucesor di Raul Castro. Pa prome biaha den bida di mayoria di e Cubanonan, un homber, cu no tin e fam Castro, lo asumi liderasgo di e nacion insular, administra pa e comunistanan.
Fidel Castro a bisa durante hopi tempo cu e ta spera di muri mientras cu ainda e tabata na mando, pero despues di un enfermedad misterioso y un cirugia intestinal na 2008, el a haya su mes obliga di a baha. El a fayece na aña 2016. Su ruman homber mas chikito, Raul Castro, a reemplas’e como hefe di estado, e partido comunista di Cuba y e ehercito di e isla y a priminti cu su revolucion lo ta “prospero y sostenibel”.
Poco hende a spera cu lo bay tin algun cambio den e unico pais comunista di e hemisferio occidental, por lo menos no di manera inmediato.
“Cuba lo bay sigui ta Cuba, ningun hende lo bay cambi’e”, asina Elian Gonzales, e balserito Cubano a bisa na CNN, despues cu el a bira famoso ora cu a hay’e na e costanan di Florida na aña 1999. Gonzalez, kende e tempo ey tabatin 5 aña, a keda cerca famianan na Miami, pero a bin bek Cuba cu su tata, despues di un bataya duro den corte.
Frecuentemente por a wak’e hunto cu Fidel Castro, kende e ta describi como un tata p’e.
Gonzalez, awo di 24 aña, ta un di e defensornan mas fuerte di e revolucion Cubano y hopi Cubano ta kere cu algun dia e lo tin un rol di liderasgo.
“Cuba no lo cambia si bin otro gobierno, si bin otro presidente,” el a bisa. E lidernan Cubano ta bisa cu nan “ta perfeccionando” e revolucion mientras nan ta resisti presionnan externo pa habri economia y e sistema politico.
