Michelle La Haye: E operacion na Sint Maarten lo ta uno largo

Cruz Corra di Aruba for di prome instante, prome cu pasada di horcan Irma, tabata presente na Sint Maarten pa yuda. Y despues di e pasada un otro grupo di boluntario a biaha pa Sint Maarten. Tambe ta presente aya bou Michelle La Haye, director di Rode Kruis Aruba.

La Haye a participa tambe den e reunion di Gobierno di Sint Maarten, cu a conta cu presencia tambe di Prome Minister Mike Eman kende diamars ultimo a biaha pa e isla.

La Haye a splica den cu ainda e isla di Sint Maarten ta den un situacion di emergencia y esaki ta e tipo di yudo cu boluntarionan di Cruz Cora Aruba ta brinda hunto cu nan coleganan di otro islanan y demas boluntarionan. E por bisa cu na masha poco luga riba e isla tin awa of coriente y aworaki ta e hendenan riba caya ta suministrando e boluntarionan, di e islanan Hulandes, cu poco awa y cuminda. E trabou cu nan ta realisando ta tumando luga den estrecho contacto cu Gobierno di e isla y Marina Hulandes. Y hustamente cu Marina Hulandes nan ta trahando pa distribuicion di e materialnan cu a bin ta yegando e isla.

El a recorda cu e prome dianan no tabatin comunicacion of esaki tabata hopi dificil. Door di e situacion aki hopi situacion a bay malo y e yudansa no tabata bay asina lihe manera cu lo por tabata si tabatin un debido comunicacion. “E ta un operacion hopi compleho. Un isla asina chikito, pero cu un daño enorme y sigur no por spera u e situacion ta wordo soluciona den un dia. Boluntarionan di Cruz Corra ta traha di dia y anochi pa brinda e ayudonan asina necesario.”

Manera ta conoci, Cruz Corra Aruba a manda tres boluntario adelanta cu telefon satelital, y a wordo compaña pa un disaster manager di Corsou. E operacion aki, el a bisa, lo bira uno largo, y lo mester di boluntarionan pa reemplasa esnan cu ta na Sint Maarten aworaki. Te awor e cooperacion ta bayendo hopi bon, el a bisa.