Parlamento mester a drenta un era nobo, un era caminda fraccionnan cu ta sostene gobierno, lo bay duna un otro nificacion, otro contenido na e trabou den Parlamento caminda transparencia, integridad y sinceridad ta e puntonan mas clave di e rumbo nobo aki cu fraccionnan di MEP, POR y RED a priminti tanto na pueblo como na Gobernador.
Parlamentario Michael Lampe di fraccion di AVP ta mustra cu di e promesa aki pa un era nobo, te ainda fraccionnan cu ta sostene gobierno, no ta cumpliendo cu e promesanan aki y caminda un biaha mas integridad y transparencia cu tanto gobierno a priminti, no ta existi.
“Ya caba despues di tratamento di presupuesto 2018 mi a atende desaroyonan cu a tuma luga durante di e reunion aki, tanto riba tribuna pero principalmente pa comportacion y reaccion di miembronan di fraccionnan cu ta sostene gobierno di coalicion.
Practicamente por a conclui cu sigur 70% di tur loke a wordo trece dilanti pa diferente miembro di fraccionnan cu ta sostene gobierno, tabata atakenan politico sin sentido, solamente culpando gobierno di AVP y e comportacion aki a bolbe continua durante tratamento ultimo di e cambio di ley pa aumena BBO y BAZV.
Na momento cu tanto gobierno como miembronan di fraccionnan pro gobierno ta papia di integridad, comportacion y e forma con ta atende reunionnan publico pa controla maneho di gobierno, integridad y sinceridad tambe mester resalta den esakinan.
Sinembargo tin cu cuestiona e hecho cu tratamento di e cambio di ley di ‘crisisheffing,’ tres fraccion den Parlamento no a dirigi ni un solo pregunta na gobierno riba cualkier punto of aspecto di e ley aki cu ta bay tin un impacto formal riba nos pueblo y henter nos pais.
Practicamente durante di e reunion publico aki, caminda gobierno di coalicion a haya sosten di e tres fraccionnan aki pa aproba e ley di medida aki, a wordo confirma cu e promesanan pa consolida integridad di Parlamento, a sufri un golpi formal y aki por bisa cu tur frankesa cu ‘stempelparliament’ ta na ordo di dia.
Na momento cu 12 miembro di Parlamento cu ta sostene gobierno no dirigi ni un solo pregunta na gobierno riba e medida descomunal di aumento di BBP y BAZV, esaki ta muestra cu representantenan di pueblo aki, a pone interes di gobierno, interes politido na prome luga y interes di pueblo pa cual nan a huramente pa sirbi, no a conta.
Siman pasa un biaha mas a keda demostra y confirma un biaha mas, cu e duda grandi cu e tres fraccionnan di gobierno den Parlamento ta reflehando den nan funcionamento, a wordo confirma pa e comision di supervision financiero CAFT, caminda hunto cu gobierno Hulandes, a duna gobierno un siman di tempo pa trece cambionan den e presupuesto 2018.
E advertencia aki ta practicamente un critica directo riba e fraccionnan cu a sostene presupuesto 2018 y sin atende cu e puntonan cu CAFT ta señalando, a core vota pro pa e presupuesto keda aproba y awor e comision di supervision ta duna e tres fraccionnan aki, un ‘dikke onvoldoende’ mustrando cu nan no a cumpli cu nan responsabilidad como miembronan di Parlamento cu mester supervisa y controla maneho di gobierno,” Parlamentario Michael Lampe a declara.
