Meteo: Siman lo habri muha

Sevicio Meteorologico (Meteo) ta pronostica cu awe diadomingo anochi shelo lo ta levemente te parcialmente nubla cu awacero pasahero. Habriendo dialuna marduga y den dia lo ta parcialmente nubla cu posibilidad pa yobida local.

Temperatura:

Temperatura maximo lo ta di 31 grado Celsius y temperatura minimo lo ta 25 grado Celsius.

Biento:

Biento lo ta modera te basta fuerte for di direccion oost te oost-noordoost cu forsa di 4 te 5 (20 te 39 km/ora, 11 te 21 nudo). Den dia fuerte te duro den rafaga cu forsa di 6 te 7 (40 te 61 km/ora, 22 te 33 nudo)

Situacion general di tempo:

Den e proximo 24 oranan mas nubia lo pasa riba nos isla cu principalmente den oranan di marduga y mainta localmente un awacero breve. Diferencianan di presion di aire ta aumentando den area di Caribe.

Consecuentemente esaki lo pone cu biento lo supla mas duro y lama lo bira localmente bastante bruto te bruto.

Un aviso pa boto chikito lo drenta na vigor mayan mainta 6’or.

Condicion di lama:

Olanan di lama lo ta for di direccion oost- noordoost cu haltura di 6 te 9 pia; e olanan di mas halto lo ta na costa Noord te Noordwest di e isla. Durante proximo dianan lama por yega te 10 pia na e luganan menciona y ta pidi ocupantenan di boto chikito pa tene esaki na cuenta y procede cu cautela riba lama grandi. Un aviso pa boto chikito lo drenta na vigor mayan mainta 6’or.

Pronostico di tempo pa proximo dianan di siman:

Shelo lo ta levemente te parcialmente nubla cu chens pa awasero pasahero. Biento lo ta for di direccion generalmente oost y modera te basta fuerte. Den dia fuerte te duro, tin bez hopi duro den rafaga. Temperatura max / min lo ta: 31/26 grado Celsius.

Meteo lo emiti e proximo boletin riba dialuna 19 di februari 2018 pa 5:00pm.