Mervin: Despues di 100 dia di gobernacion pueblo sigur ta sinti e cambio

Parlamentario, drs. Mervin Wyatt-Ras ta trece padilanti cu e gobierno aki envez di hiba Aruba padilanti solamente ta trece probresa den nos pais. Wyatt-Ras ta mira cu den 100 dia di gobernacion no a trece ainda nada nobo beneficioso pa nos hendenan.

Masbien ta presegui y ta kita hende foi trabou hincando nan y nan famia den pobresa. Awor hasta ta anuncia manera cu no ta nada cu CITGO lo “slow down” cu su trabounan y cu lo manda un cantidad di trahador, pa ta mas exacto 345, cas. Con por ta cu e actual Minister Presidente sra. Evelyn Wever Croes y especial e minister di Asuntonan Social y Labor, sr. Glenbert Croes, cu segun Wyatt-Ras den oposicion semper a posiciona su mes pro e trahador, awe ta haci comosifuera e no por haci nada. Ni sikiera e ta indica di lo purba haci algo pa e trahadornan aki. Kiermeen e gobierno aki lo permiti pobresa pa otro 345 famia sin haci nada pa yuda. Unda e viahenan pa Venezuela a keda? Wyatt-Ras ta sospecha cu e gobierno di MEPPORRED cu ta geplak na otro cu “scotch tape” tin miedo pa e tape los y cu e coalicion lo kibra y pesey kizas nan no ta worry mes kico ta pasa cu nos hendenan cu lo wordo kita for di trabou, basta pa complace otro den e coalicion.

Mervin Wyatt-Ras kier sa kico lo bai haci pa e famianan aki por haya un yudansa pa e temponan dificil cu nan lo bai pasa aden. Pero envez di esaki e ta scucha acusacion cu lo ta falta gobierno di AVP. Aserca kier hinca skolnan publico den un fundacion unda ta mishi cu e derecho di maestronan y personal den ensenjanza, sin espacio pa opinion di esnan envolvi.
Esaki ta e cambio cu MEPPORRED a priminti nos pueblo? Esaki ta e politiconan cu lo a traha cu alma y cuerpo pa saca nos hendenan padilanti? Esaki ta e politiconan cu a priminti di hisa calidad di bida di nos hendenan? Pa tapa cuenta e minister di labor a bin core bisa cu e kier hisa salario minimo pa despues e hala atras paso e tin cu bai consulta cu e diferente entidadnan responsabel promer cu e por tuma un decision.

Segun Wyatt-Ras a pasa 100 dia di gobernacion ainda ni Foe ni Fa pa adelanto di nos hendenan. No tin ni un plan di maneho, ni presupuesto ni a oficialisa e ministernan den un Landsverordening Instelling Ministeries.
Envez di haci manera gobierno di AVP pa aumenta bijstand, pensioen, duna un schoolkinderentoeslag y crea desaroyo pa un y tur ta keda kita hende foi trabou kitando pan for di nos hendenan. Den e 100 dia di gobernacion nos pueblo sigur ta sinti e cambio, esta e cambio pa pobresa.