Merca kier domina cosmos. P’esey el a anuncia oficialmente diahuebs e creacion pa 2020 di un Ehercito dedica na e siguridad den espacio, “e proximo campo di bataya”.
E vice presidente Mericano, Mike Pence, a detaya na Pentagono e pasonan pa sigui pa e nacemento di Forsanan Espacial, e di seis rama di e Forsanan Arma. E propuesta anuncia pa Donald Trump na Juni, ta bisa di ta responde na e menasanan di Rusia, China y Noord Korea, cu kier “desbarata e sistemanan di satelitenan di Merca.
E propuesta aki lo wordo manda pa Congreso pa asina discuti su aprobacion, cu ta inclui un presupuesto di 8 mil miyon di dollar den e proximo cinco añanan. E criticonan ta mira e creacion di un Forsa Espacial como un esfuerso burocratico inecesario y costoso y ta burla di e comparacionnan cu e fundacion di Forsa Aereo na 1947. E exastronauta Mericano Mark Kelly, a rechasa diahuebs e idea pa consider’e redundante y un gastamento di placa, segun el a bisa na MSNBC. Aunke el a reconoce cu Pence tin rasion riba e menasanan di exterior, el a defende cu e Ehercito ya caba ta afrotando nan.
E defensornan, di nan parti, ta kere cu e division aki ta imprescindibel pa garantisa e “dominio” Mericano di cosmos. “Nos adversarionan a transforma ya espacio den un campo di bataya nobo,” Pence a argumenta. ‘Loke den su momento tabata pacifico,” e vice presidente a adverti, “awo ta yena di hende y di confrontacion.”
E propuesta di Gobierno ta inclui cinco punto: acelera tecnologia espacial y e iniciativanan di desaroyo estableci den e Strategia di Defensa Nacional di Trump. E creacion di e Comando di Espaco, cu lo ta den e ultimo instancia e aparato responsabel di e Ehercito nobo aki; e formacion di e tropanan unda nan lo convoca “e miho y e Mericanonan mas balente pa disuadi y vence den un generacion nobo di menasa;” establece un Agencia Espacial cual obhetivo lo ta “e investigacion y innovacion” pa dota na Pentagono di tur e recursonan necesario pa ehecuta e mision nobo aki; y e nombramento di un subsecretario di Defensa pa espacio, cu lo ta un civil, cual tarea lo ta pa garantisa pa cumpli cu e “plazo y obhetivonan” marca.
E creacion di e division nobo di e Forsanan Arma, ta e prome den 71 aña. E di seis ta suma na e Ehercito di Tera, Arma, Guardia Costera, Cuerpo di Marina y Forsa Aereo. Actualmente, espacio ta bao di e responsabilidad di e ultimo.
