Na Aruba tin scol cu ta uza un sistema, caminda cu mayornan por sigui e desaroyo di alumno na scol. E scol ta uza e sistema aki pa rooster y otro informacionnan importante cu mester comunica cu mayor y alumnonan. Pero tambe por mira e cifranan y ausencia cu motibonan di cada alumno individual .
Cada alumno tin su perfil y mayornan tin acceso na dje. E sistema aki ta wordo yama Magister, y na Merca nan tin problema cun’e, mirando cu Servicio Secreto di Merca por wak den e sistema aki. Segun e website Follow the Money, un investigacion a divulga cu e compania cu ta tras di e sistema aki, tin acceso na informacion di miles di studiante y cu ta percura pa ora di cera contracto cu scolnan, cu lo firma tambe un acuerdo pa proteha privacidad di e studiante. Sinembargo, e convenio aki no a mustra cu por uza e dato aki pa metanan di mercadeo.
Trafico di data ta bay via e compania Mericano Akamai y automaticamente ta cay bao di ley Mericano, cual ta mustra cu departamentonan Mericano di informacion y tambe Servicio Secreto, tin acceso na e trafico di data aki. Ley di privacidad na Europa mester proteha privacidad di studiantenan. Aunke fuentenan ta mustra cu no tin suficiente capacidad pa aplica e ley aki. Por ultimo, ta resulta cu mayornan tin acceso na e informacion di studiantenan, mientras cu companianan priva kier gana placa cu e informacionnan aki. Scolnan no ta investiga unda e informacionnan aki ta bay y un gobierno ta bin cu regla, pero no ta pone fondo siponibel pa asina por ehecuta e ley.
