Ora cu minister Arthur Dowers a asumi su funcion como minister, na Cuerpo Policial no tabata tin informacion bon acumula cu por a traha cun’e pa por dirigi riba ki tipo di crimen tin cu duna prioridad. E tempo eynan Rocco Tjon ta un di nan cu a haya instruccion di comisario di polis, door di instruccion di e minister, pa percura pa e datonan aki wordo acumula. Ta prome biaha den historia, na momento cu a pidi pa duna informacion kico ta pasando riba e pais aki, por a cuminsa traha riba un maneho. Por a mira MEP traha plan di maneho. Si traha un plan di maneho y no sa kico ta pasa riba bo pais, bo ta puntra bo mes si ta wilde weg, ta pone cos riba papel pa tuma hende haci. Esey tambe sr. Bikker kier haci. Dowers si no ta haci esey. A traha un plan di maneho dirigi pa crea un base solido pa tur e departamentonan aki bay funciona optimal.
E base solido ta nifica tambe cu Cuerpo Policial mester acumula informacion di crimen den un forma contundente y confiabel y nan a logra haci esey. Basa riba esey ta traha e siguiente plan di maneho.
Hopi cos ta dirigi riba e parti tecnologico. Ta uza tecnologia pa preveni cierto crimen.
Un di e problemanan grandi cu tin ta caminda cu muchanan ta bay purba di comete actonan di crimen. Ta cosnan cu por wordo preveni. Unicamente door di e formacion, educacion na cas. Ey e ta cuminsa. Partido MEP ta bisa cu e solucion ta cu nan ta bin cu helicopter. Nan ta horta mita di programa di maneho di AVP y cu esey nan ta bay combati crimen. Absolutamente cu no.
Mester cuminsa na e fundeshi. E fundeshi ta nifica, educa y forma hende. E ta nifica tambe, crea e plataforma cu a draai e piloto cun’e, caminda cu ta pone tur hende hunto.
Si tin un mucha di cinco aña cu awor ta core mata pushi den mondi, mata galiña, mata paloma, ta conoci pa Husticia, mester dun’e un guia, pasobra casi sigur despues ta busca hende pa mata. Tin cu tene cuenta cu e asunto di criminalidad ta algo serio. No ta algo pa tira para riba dje, pone un aspecto y bisa cu ta esey ta bay solucion’e. MEP nunca den su historia a demostra ningun seriedad pa loke ta trata combatimento di criminalidad. MEP nunca a pone atencion na cuerpo policial. MEP nunca a respeta nos Cuerpo Policial. Nan a insulta nan continuamente. Awor aki por mira cu MEP ta bin pretende cu nan tin siguridad di pueblo na pecho. Si tabata tin un minister di husticia cu tabata tira den su mesun auto. Cu tabata uza un miyon pa proteha su mes. Tempo cu nan a bisa cu cos ta bon. Prensa mester realisa esey. Tempo cu cos tabata bon segun nan, nan ta coy un miyon di pueblo pa proteha e minister di husticia. Awor cu cos segun nan, no ta bon, nos tur ta cana trankil. Ora cu MEP papia cosnan, nan mester bira serio.
