Mayor preocupa: Colegio Arubano no a cuida alumnonan bon na Colombia!

Tur hende cu conoce mi sa cu mi ta un persona positivo y no ta opta pa uza mi pagina di FB pa e cosnan aki pero mi ta hopi asertivo tambe y pa defende derecho di mi yiu mi ta haya mi ta vocifera mi preocupacion/ keho. Esaki pa purba evita cu cosnan asina pasa den futuro cu yiu di otro hende y como tambe pa mayornan tin un rol mas pro activo pa cu e asuntonan aki. Tuma tempo pa lesa esaki. Mi sa cu e ta poco largo pero ta informacion importante pa bo sa si bo yiu ta bay Colegio Arubano of cualkier otro scol unda nan ta organisa “studiereis” pa nan alumnonan. Esaki ta experiencia di mi yiu durante su biahe pa Pereira cu Colegio Arubano.

Mi yiu a bay studiereis di Havo 4 Colegio Arubano dia 2 di april 2018 te cu dia 9 di april 2018. E tawata hopi ilusiona pa bay e biahe aki. Na final, nos como mayor y tambe nos yiu a experiencia tanto cos cu ful e trayectorio di e biahe a bira un desapunto y preocupacion. Mi ta bay resumi den corto kico a pasa cu nos yiu y kico nos como mayor a experiencia. Tur loke mi ta bay conta , nos tin prueba di dje por escrito y tambe nos a manda un carta di keho oficial awe pa Colegio Arubano, como tambe SMOA y DPS.

Nos yiu a laga su carry-on den avion na Bogota (vuelo di conexion pa bay Pereira). Den e carry-on ey tawata tin remedinan cu e mester sigui tuma despues di a haci 2 operacion den e ultimo 6 lunanan. Fuera di esey no tawata tin nada mas di mucho balor den e carry-on. El a laga su carry-on den e avion despues di a puntra su reisbegeleider 2 biaha tocante esaki. Ora a yega e ora cu a detecta cu e carry-on a keda den avion nos yiu a notifica maestranan di biaha tambe cu su remedinan a keda eyden.

Resumiendo acontesimientonan: Nos como mayor mester a lucha pa bienestar, salud y siguridad di nos yiu, pasobra 2 projectbegeleiders di Colegio Arubano a bisa nos (verbal y por escrito) cu nan NO ta wak e perdemento di nos yiu su maleta como prioridad ni tampoco un emergencia. Sabiendo e contenido di e maleta y su proposito. Segun un di nan, e no por bay laga 130 mucha atras, kita for di su post pa bay claim un carry-on perdi paso nan ta keda bisa cu esaki tawata responsabilidad di e mucha. Nos a bisa nan claramente y ken cu conoce nos y con nos ta educa nos yiunan, cu si no ta pa e remedinan den e maleta nos NO lo pone tanto enfasis den claim e carry-on y lo a warda pa claim ora e mucha bin bek Aruba. Tanto aña Colegio tin ta bay studiereis y ainda nan no tin un plan di maneho pa cu emergencia? Mi a keda comunica via messenger di facebook di studiereis Havo cu un projectleider y e trato cu nos a haya di dje a laga masha di desea pero mas tanto e negligencia y responsabilidad pa cu nos yiu nos a condena.

For di dia 3 di april mainta tempran nos a comunica cu un number di celular cu a wordo poni riba FB di Havo studiereis pa comunica cu nan na Pereira door cu e finca nan a bay hospeda no tin WiFi. Ora mi a yama mainta tempran a bin resulta cu mr. Satiago Ortiz, Director di ITZ Colombia a contesta, mi a splik’e e sucedido di mi yiu su carry on y el a bisa cu e lo bay wak kico nan lo por haci asina e delibera esaki cu e projectleidernan y a puntra tambe con NOS por yude. Nos mes a yama Avianca aki na Aruba y a duna via un whatsapp msg Ortiz y un otro projectleider tur datos y con e procedura ta pa claim e maleta. Nos a hasta manda potret di nos yiu para cu su maleta pa Avianca wak riba e FB di HAVO Studiereis. Dianan ta pasa y cada biaha nos comunica cu e projectleider of Ortiz nos ta haya otro version of nan tin un excuus pakico no a bay claim e carry-on te ainda. Tur esaki nos tin riba chat como prueba. Tur dia nos yiu tawata puntra ki dia nan ta bay regla pa e haya su carry-on bek cu su remedinan pero tur dia tawata tin un otro excuus. Nos mester a tende na mas di un ocasion cu e caso di nos yiu NO ta prioridad, cu nan schedule ta druk, y cu nan ta wak cu e mucha ta bon. Esey ta e motibo pa cual e project leider a bisa pakico e no a bay laga su logistica di 130 mucha atras paso nos yiu ta “MUSTRA” bon y cu tin un paramedico stand by pa cualkier cos.

Awel si, NI e projectleider, ni e director di e tour operator, ni e paramedico NO ta den capacidad pa diagnostica si e mucha ta bon. Nan NO ta e mucha su specialista cu a opere, ni tampoco por dicidi pa laga e mucha keda sin haya su remedinan cu tawata su tratamento despues di operacion indica door di su specialista. Ademas tawata tin par di e remedinan aki cu tawata pa alergia. Si algo pasa nos yiu durante un excursion/ hike leu di un hospital, e paramedico NO por haci nada. Ta su remedi so por a logra esaki. Despues di tanto insistencia di nos parti e project begeleider cu nos yiu y cu Ortiz a bay aeropuerto pa claim e carry-on casi na final di siman. Nan a bisa nos yiu y como tambe nos como mayor (por escrito) cu nan a pone e claim pero ta bay tarda pa haya contesta. Akinan tambe e version di Santiago Ortiz tawata cambia den su chatnan y lantando mas incertidumbre y preocupacion den nos. Na e momento ey nos como mayor a pidi nan (Ortiz y e projectleider) un prueba cu nan a claim pa mi por sigui follow up aki na Aruba pero ningun di dos a manda esaki. Na final e project leider a bisa mi cu si mi no ta gusta con el a handle cu mi por sigui handle e asunto aki cu e conrector di Colegio, cual nos a haci diabierna. Danki na su intervencion rapido, nan a bay cumpra remedi pa Elyza na Pereira pa e por sigui cu su tratamento. Pero esaki apenas te cu diadomingo esaki nos yiu por a cuminsa tuma e remedinan. Esaki faltando apenas 12 ora pa e alumnonan bin bek Aruba.

Despues cu mi yiu a bin bek Aruba ma keda warda riba e email cu prueba di Santiago Ortiz y e projectleider pa cu e claim di mi yiu su maleta. Esaki te dia di awe nos NO a haya. Ultimo chat cu Ortiz el a sigura mi cu e lo laga su secretaria haci’e. E joke a bira cu dia ta pasa y mi mes a bay Avianca pa follow up pa cu e supuesto claim cu a wordo poni na Pereira. En corto: Avianca a tuma un claim cu ami a haci pa cu e carry –on di mi yiu y den menos di 24 ora mi a bay busca esaki na aeropuerto!!!!!!!!!! Excelente servicio di Avianca. Eynan tambe ma siña cu nan tin un call center cu ta habri 24/7 pa duna servicio y cu bo por pone un claim via email desde cualkier celular cu datos di e mucha y su maleta y vuelo. Datonan cu Ortiz a keda cune y como tambe e projectleider tawata tin acceso na dje. Mas ainda Avianca a confirma mi cu ami tawata e unico cu a pone un claim pa e carry-on di mi yiu y cu niun claim a wordo haci na Pereira pa e carry on. Esaki ta haci cu nos como tambe nos yiu a wordo tuma haci tur e dianan aki y pa colmo por escrito cual mi tin tur prueba di esaki y como tambe e claiming di maleta.

Ainda mi NO por compronde con un docente por a handle asina cu salud di nos yiu, tuma nos haci y tambe e meneer Ortiz. Cerca nos el a perde tur credibilidad y a mustra falta di seriedad, coherencia y compromiso pa cu e servicio cu el a duna. Anto e Tour operator aki Colegio ta confia y ta defende tanto asina den corant? Ful e siman nos a kere cu ta cu adultonan responsabel nos a encarga nos yiu. Tur esaki tawata negligencia y violacion contra derecho di nos yiu pa cu su salud/ bienestar y siguridad.

Mas ainda ora di regresa Aruba nos yiu a perde den aeropuerto di Bogota. Ora avion a baha el a pidi e stewardess pa bay baño y ora el a sali di e avion/ gate, ful e grupo incluyendo e docentenan a bay lag’e! E mester a haya su caminda bek puntrando aki aya unda su gate ta pa por regresa Aruba. Cu tur consecuencia peligroso cu esaki por a trece cu ne. Ora finalmente el a topa bek cu su grupo, NI e docente tawata sa cu nos yiu tawata perdi!!! Esaki ta un falta di responsabilidad enorme di parti di e docentenan cu a biaha cu e muchanan aki. Tanto bal exigi pa tur mucha tin un cierto color di uniform bisti si no tin control!! Nan no sa e regla di “samen uit, samen thuis?” Nos como su mayornan ambos ta docente y SA cuanto responsabilidad ta pa tuma encargo di yiu di hende. Cuanto biaha mi mes no a cana dwars door di stad na pia cu un klas di mas di 30 mucha di 1e klas pa bay wak La Reina pasa dilanti bestuurskantoor of pa otro actividad na un stadion. Den un multitud di hende. Nunca min perde ningun yiu di hende y tawata conta cabes constant.

Ora ma kere cu esey tawata tur cos ainda e cuenta no a caba paso ora mi yiu a bin bek y a conta mi cierto cosnan e ora ey si ma alarma mas. Tras di e pregunta di un otro mayor durante anochi di informacion si e muchanan ta bay haya awa den boter, e project leider a contesta cu SI. Esaki NO ta cuadra cu realidad paso e muchanan y docentenan a haya awa den saco pa bebe cu tawata smaak clorox segun nos yiu. El a haya varios dia dolor di barica y molester. El a bisa nos cu muchanan y docente tawata cumpra awa di boter pa bebe na supermercado. Si e awa tawata smaak Clorox, cu esey mi por deduci cu e no ta potabel paso un awa di marca renombra cu turista ta bebe ora nan bay afo NO ta smaak Clorox. Aki un bes mas nos como mayornan a pone ful e organisacion di e biahe aki como tambe e tour operator responsabel. Nan tawata haci wega cu salud di hende. Nos ta puntra nos mes, pakico si e docentenan a wak cu nan tur a wordo ofreci awa den saco, no a exigi pa nan haya awa den boter manera cualkier turista? Y segun a wordo sigura durante e anochi di informacion na Colegio? Durante e info avond nos a wordo bisa cu $70 di zakgeld ta yega pa e mucha bay cune pa ful e siman. Yega pakico? Pa cumpra awa? Muchanan tawata come laat y pa ora cuminda yega e tawata friu ( den foam box). Un di nan famoso “meat night” tawata galiña cu aros cu batata hasa friu. Dios sa cuanto ora e cuminda aki tawata den foambox y ta di unda el a bin y ken a trahe. Den un pais asina rico na fruta y berdura fresco, min manda mi yiu Pereira pa come cuminda friu den foambox. Den e cushina nos yiu ta bisa cu tawata tin 1 frigidaire pa 130 hende y tin biaha hasta nan tawata mester pone wea cu webo herbi riba vloer paso no tin espacio riba e aanrecht. Tur esaki nos ta condena paso niun mayor a manda nan yiu pa bay un trip pa expone nan mes na condicionnan sanitario asina.

Mayornan cu nan yiu a bay e biahe aki….. boso a papia cu boso yiunan? Den corant mi a lesa e motibo pakico a scoge pa e finca y como tambe pakico a pone entre 10 pa 14 mucha den un camber. Pa budget y pa muchanan socialisa mas cu otro. Awel con a controla anto actividad sexual? Cu segun e muchanan esaki tawata pasando y tambe esaki tabata sosode entre muchanan di mesun sexo. Mi yiu a bin conta mi di actividad di droga y alcohol y na un caminda cu nan a bay na un parke e NO tawata sinti’e safe paso yen di hende tawata keda wak nan na manera sospechoso y tawata pidi placa. E feedbacknan aki mi a tende tambe di mas mayor y no di mi yiu so!!!

Den corant tur estadistica di colegio ta mustra asina bunita y prometedor pero loke pa mi no ta cuadra ta ora mi puntra otro mayornan con nan yiu a experiencia e trip, nan ta duna mi mesun feedback. Tin otronan no tawata sa mes kico tur tawata pasando eynan paso nan yiu no a conta nan nada y e ora nan a alarma. Tin otronan cu tawata SA pero no ta tribi di bin dilanti pa Colegio no tuma represaya riba nan yiu despues. Riba facebook mi por a lesa un par di comentario di muchanan cu a pasa super leuk y cu e luga tawata limpi etc. Mi ta contento pa nan. Probablemente esey tawata pasobra nan mes mester a haci nan camber y baño limpi. Den cada camber tawata tin basora y mop y hemchi y nan mes mester a bay busca desinfectante pa haci limpi. Tawata tin tourguide cu tawata corta cabey di e muchanan pa 20.000 pesos. E tawata traha den un barbershop segun e mes tawata bisa e muchanan. E barber aki tambe tawata tin licencia pa ta tourguide?

Cu e muchanan a siña cosnan nobo durante e biahe mi no ta duda, cu Pereira ta un bunita destinacion pa ecoturismo, esaki tambe mi ta kere mirando e potretnan. Pero boso y Colegio a sinta pensa,……. tur esaki….. a costo di kico? A costo di siguridad y bienestar di nos yiunan! Mayornan habri wowo!