Marriott Ocean Club a celebra “100 Way to Go” cu Zeick Paalman

Marriott Ocean Club a reconoce Zeick Paalman cu a logra no menos di 100 comentario di huespednan “Way to Go”. P’e asociadonan por a yega 100 Way to Go, e huespednan di un time share ta haya un encuesta cu por yena informando con e estadia tabata y e trato ricibi.

Zeick Paalman ta un front office agent di Marriott Ocean Club y General Manager di Ocean Club, Erwin Noguera, a expresa cu pa nan ta un honor pa celebra e logro di Zeick Paalman. Ta e esfuerso y empeño den su trabou ta loke a hibe te eynan. E ta impacta e turistanan, kendenan a bay bek nan cas despues di nan vakantie, a ricibi un e-mail automatico pa duna nan opinion di e resort y di un empleado cu a destaca. E asociado a haci un impacto riba e turistanan y nan a skirbi su nomber 100 biaha caba.

 

Semanalmente Zeick Paalman ta conoce hopi hende, specialmente den fin siman cu tin 4 dia di check in y e mester brinda e mesun hospitalidad tras di otro. Marriott Ocean Club ta orguyoso, pasobra esaki no ta bin zomaar pero cu empeño, dedicacion, hospitalidad cu nan ta spera di Aruba y Marriott Vacation Club. A celebra e momento special aki cu famia di Zeick Paalman, unda cu e gerencia a dun’e pabien pa su logro. Marriott Ocean Club a celebra e di 3 evento di “Way to Go” y a mira e importancia pa celebra e di 100 bon recomendacion, asina Erwin Noguera a expresa. A gradici Zeick Paalman pa su trabou y su famia cu ta apoy’e pa su trabou.

 

Zeick Paalman su funcion diario ta check in y check out e huespednan, pero e ta haci mas door di percura cu e guestnan ta bon cuida p’e cosnan mas chikito manera un bombio kima den camber pa algo mas grandi. Ta parti di e trabou di un front office agent pa check cu tur departamento pa percura cu guestnan ta contento, pero tambe bay e extra miya pa nan. P’e por a logra 100 Way to Go ta bin pa motibo cu tur guest ta diferente, el a expresa. Bay e extra miya no ta nifica na trabou so pero tambe den tempo liber si mester hiba algo pa un guest na aeropuerto of otro caminda.

E asociado tabata sorprendi di a yega 100 Way to Go y ta contento cu e compania y su hefenan ta aprecia nan pa t’ey p’e guestnan y coleganan. Zeick Paalman ta conseha tur hende pa kere den nan mes y bay p’e. Compania ta duna asociadonan e oportunidad pa bay dilanti y ta keda na nan pa bay dilanti y percura pa crece.

 

Marriott Resort a habri na Aruba na aña 1995 cu 413 camber. Na aña 1999 a habri Ocean Surf Club cu 311 camber y na aña 2004 a habri Surf Club cu 450 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.

 

Pa esnan interesa di cuminsa un carera na Aruba Marriott por bishita nan website www.marriott.com/careers pa revisa e vacaturnan cu tin actualmente y aplica online.