AVP a tene su conferencia di prensa semanal. Marlon Sneek a hiba palabra. E kier a coregi algun cos cu nan a mira den fin di siman y sigur, prome cu aña a caba, algun show cu a tuma luga. El a splica cu nan lo keda cu wowo hancho habri y orea gespan y caminda cu tin cosnan raro y straño tuma luga, nan lo coregi nan un bes.

E parlamentario a menciona un articulo caminda ta para cu minister Dangui Oduber y prome minister Evelyn Wever-Croes, a haci donacion na diferente instancia. Aki ta mustra supuestamente dos minister di MEP a haci donacion na diferente instancia, uzando e slogan cu nan tin, poniendo hende central. Sneek a menciona pa wak bon riba e articulo caminda ta para cu tin cu wak bon riba e cheque cu ta para Reina Beatrix. E cheque ta di aeropuerto Reina Beatrix, cheque di Triple A. Placa cu a keda atras di AVP. Asina aki e tabata tuma luga den pasado. AAA ta bay haci’e pasobra e ta parti di nan maneho, ta un NV di gobierno. Mañan nan ta bay cana rond di Elmar, cu di WEB, di tur NV di Gobierno.

E cosnan aki tabata tuma luga caba bao di tur gobernacion. Pero simplemente e departamento of den e caso aki, AAA NV ta esun cu ta haci’e, pasobra ta parti di nan maneho. Awo por mira cu tin un minister of dos di nan, cu ta coy e chequenan di e NVnan di gobierno y bay hunga rol cu nan, bisa cu nan ta pone hende central.

 

E ser humano ta central pa AVP

 

Mas leu Marlon Sneek di AVP durante e conferencia di prensa a splica cu gobierno cu a bay tabata coy fondo di NV di gobierno y parti esaki na disponibilidad di e comunidad. Gobierno di Aruba ta pone e ser humano na prome luga. Minister Oduber a traha un afslag di grijs pa un luga, caminda cu el a pone e ser humano central. Esaki ta e hendenan cu tabata bisa cu asfalt no ta importante, cu tabata bisa cu klinker no ta importante. Pero awo cu nan ta bay traha un caminda, awo si ta pone e ser humano central. Esaki ta e locura cu tin ta tumando luga den e gobierno aki.

Ora bo ta papia di pone hende central, ta locual cu gabinete Mike Eman I y II a haci. Ora cu mira un reparatietoeslag pa nos pensionadonan, cu ta costa gobierno 20 miyon. Kiermen, gobierno tin 20 miyon menos pa e por uza den su maneho, e ta prefera di sacrifica y pone pa nos grandinan. Ora cu mira 15 miyon di reparatie toeslag pa esnan cu ta cobra e salario minimo. Gobierno por a tene e 15 miyon aki y haci cualkier proyecto cun’e, of pone esakin a disponibilidad na un departamento cu mester di algo. Pero a scoge pa pone 15 miyon na disponibilidad di e comunidad. Ora cu mira un gobierno cu ta hisa un onderstand cu 25%. Ora ta mira un kinderschooltoeslag, cu en totalidad ta costa e gobierno 5 miyon y no ta bisa, ta keda cu 5 miyon aki pa friends and family. Den Bestuurskantoor segun AVP mester pone luz di trafico pasobra Friends and Family ta dal den otro canando eyden. A scoge pa pone placa pa hende. Pa e ser humano ta central. Ora cu mira e ambtenaarnan, sin mester a subi caya, a haya nan indexering. Ora cu a mira con e diferente toeslagnan a subi, ta papiando ta riba 5 mil florin pa aña, a cada ambtenaar, un total di 30 miyon florin cu gobierno a inverti den su hendenan cu ta traha p’e. Djis den e paar di proyecto cu a menciona, ta papiando di 70 miyon cu Gabinete Eman a scoge pa pone na disposicion di hende. Den e caso aki pa pensionadonan, esnan cu ta cobra salario minimo, esnan cu ta cobra den e caso aki un onderstand, esnan mas debil den nos comunidad y tambe esnan cu ta traha pa gobierno. Ta mira claramente un maneho di pone hende central.