E mama di Natalee Holloway ta demandando Oxygen Media, bisando cu e cadena ta uza
pretextonan falso pa haya un muestra di su DNA. Den e demanda, obteni pa TMZ, Beth Holloway ta bisa cu e canal di NBC a bis’e cu hendenan asocia cu un docuserie riba su yiu muhe, a descubri cu nan ta kere cu lo ta e restonan di Natalee Holloway Holloway na Aruba.
Como un resultado, e show a pidi un muestra di DNA for di Beth Holloway. E muestra a wordo uza durante e grabacion di e docuserie di seis parti di Oxygen, titula “The Dissappearance of Natalee Holloway.” Natalee Holloway a desaparece na Aruba na 2005. Un hues a declar’e morto na 2012. Su mama ta declara cu el a kere cu e show a haya e restonan di su yiu muhe y ta pa e motibo ey el a duna Oxygen un muestra di saliva. Sinembargo, e restonan na final no tabata di Natalee. De facto, solamente un di e cuater pida wesonan cu a test, tabata humano. E mama ta bisa den e demanda cu Oxygen a gañe y cu nunca e mester a participa den e serie of duna un muestra di DNA si e tabata sa di e berdad. Un representante di Oxygen no a contesta e peticion di Fox news pa un comentario. Tata di Natalee, Dave Holloway, tabata un gran parti di e serienan aki.
Beth y Dave Holloway a divorcia na 1993, hopi prome cu e desaparicion di nan yiu muhe. Dave Holloway a biaha pa Aruba cu e investigado priva TJ Ward pa 18 luna, pa busca e curpa di Natalee. E tata di Natalee a papia cu Fox News na Augustus 2017, mientras cu nan tabata warda e resultadonan di e test di DNA. El a conta cu na e momento eynan, cu e no tabata optimista di e resultadonan. “Nos a bay tras di hopi indicacion y bo tin speransanan na halto, pero nan ta cay den otro. Basicamente bo ta bay un entiero. Uno tras di otro,” el a bisa. “Asina ta bo ta traha un barera, cual ami a haci y bo ta djis sinta warda wak y no purba di pensa nada. Esey ta e unico manera cu mi por trata e situacion. Mi ta sigur cu un dia pronto, probablemente mi lo ta desapunta un biaha mas, si e no ta di Natalee”. Joran van der Sloot, pa hopi tempo a wordo considera como sospechoso den e caso. Den e serienan di Oxygen, Dave Holloway a topa cu “un informante kende tabata amigo cu un individuo kende tabata tin conocemento personal di Joran van der Sloot.” Van der Sloot actualmente ta den un prison Peruano, sirbiendo un sentencia di 28 aña pa a mata Stephany Flores. Flores a wordo mata net cinco aña despues cu Natalee Holloway a desaparece.
