“Despues di a tuma algun dia pa reflecciona, awe den oranan di marduga mi a yega na e decision cu mi ta termina e relacion di 12 aña cu Top95”, asina e locutor y presentado Lyonel Dirksz a informa awe. Un disputa riba e pago di su programa na e radio a pone cu el a opta pa sigui su carera awor na Bo Guia 88.9FM.
“Durante 12 aña di cual gran parti di mi carera a tuma lugar na Top95, mi a experencia momentonan hopi special cu semper lo tin un lugar warda den mi curazon, mi lo keda agradecidi pa tur oportunidad brinda. Mi no kier bay den detaye di e motibonan y menos drenta den polemica e lo ta un falta di etica y profesionalismo dimi banda. Pesey durante e ultimo dianan aki mi a tuma pa mi mes yega na mi propio conclusion”, segun Dirksz.
E locutor a sigura cu e no tabata un decision facil, su sentimientonan ta hopi mixto, pero e ta kere cu e momento a yega unda e tin cu haci un cambio. E ta consciente cu cambio tin su risiconan, cu e por perde y e por gana, pero e afecto cu el a sinti den e 2 dianan cu e no a bay radio tabata increibel, tanto na yamada, WhatsApp y facebook, e no a logra contesta tur, pero e la dun’e un señal hopi cla den su decision.
“E señal cu el a duna mi ta bisami si di berdad mi oyentenan ta stima mi den e forma cu nan ta exprese, nan lo sigui cumi unda cumi bay, si berdad bo lo haya mi falta pronto ta un cambio abo tambe lo tin cu haci, ta di cambia e canal pa hunto nos sigui haci cada mainta uno diferente. Mi ta mas cu convenci cu e cambio aki lo ta pa miho, mi ta mas cu convenci cu un radio no ta popular solamente pa su frecuencia pero pa e hende cu ta dirigi e programa”, asina Lyonel Dirksz a conta.
Durante su 14 aña den radio, el a percura pa brinda e oyentenan programanan di cual el hinca su curazon completamente den e produccion.
“Mi ta sincero cu boso tur, cu e tabata e decision di mas dificil cumi por a tuma den mi carera. Awe ta un dia nobo, mi kier pone atras e pasado y cuminsa mira un futuro nobo, un cambio cu lo brinda nos un comienso nobo cu retonan nobo. Mi no por anuncia unda mi ta bay ainda, pero asina mi ta cla mi lo laga boso tur sa, porfabor yuda mi hiba e mensahe aki na e grandinan fiel oyentenan cu no tin facebook, bisanan cu nan yui pronto lo tey bek”, di acuerdo cu Lyonel Dirksz.
E radio lo cambia, pero Lyonel nunca lo cambia.
E cambio tey, e comienso nobo ta cla pa cuminsa…#Siguimi #banpecambio #nadanotapasapornada, tabata e “hashtag” cu e locutor a uza pa finalisa su anuncio.
