Manera cu nos a informa den forma exclusivo, mayan dialuna 8:00am, Lyonel Dirksz ta cuminsa cu su programa na Radio Bo Guia 88.9FM. E programa a haya e nomber di “E bon dia cu Lyo” y lo ta entre 8:00am pa 10:00am di dialuna pa diabierna. E lansa e programa nobo durante un evento.
Mimi Rosel-Koolman, propietaria di e radio emisora a sigura cu e no tabata un decision facil, pasobra e programacion di 8-10am ta dedica fielmente na cultura di Aruba. Tabatin hopi negosacion y combersacion prome cu “a laga e ora bay”. E ta convenci cu Lyonel Dirksz lo ta un bon adkisicion pa e emisora cu ultimo lunanan ta conociendo cambio debi na un demanda grandi di locutornan popular cu ta prefera di transmiti nan programanan for di e radio ey.
Lyonel Dirksz a cuminsa como un hoben na Canal 90 FM na aña 2004, pero a muda 2 aña despues pa Radio Top 95.1 FM, unda el a keda presenta su programanan pa 12 aña largo. Entrante dialuna 22 di januari 2018 ta cuminsa un etapa nobo pe den su carera, awor na Radio Bo Guia 88.9FM.
Cu 14 aña di experencia na radio, Lyonel Dirksz ta percura pa brinda oyentenan programanan di cual e ta hinca su curazon completamente den e produccion.
Radio Bo Guia 88.9FM ta situa na Tanki Flip y ta un di e poco radionan cu ainda ta garantisa un porcentahe halto di su programacion dedica na nos folklore y cultura. E radio a bay den aire na November 1997 y como tal a celebra 20 aña di existencia dos luna pasa. E ta conta cu un elenco di presentadonan, locutornan y DJnan capas pa entretene tur tipo di generacion y gusto di oyentenan.
