Luis Oduber di WEB: Fuel Oil cu WEB ta uzando ta wordo uza mundialmente

Durante conferencia di prensa cu a tuma luga diaranson mainta, Luis Oduber, director di WEB, a repasa kico nan tin ta haciendo durante e ultimo añanan, como parti di nan vision pa ta mas limpi, miho pa medio ambiente y tambe eventualmente liber di fuel oil.

Nan a bin ta reduci desde 2005, te cu awor aki, mas of menos 42% di fuel oil. Esey ta a base di ekiponan nobo y tambe eficiencia y mehoracion den produccion di energia y awa. Tambe door di inclui tanto biento y energia di solo den e mescla.

Motibo cu WEB a scoge e caminda aki ta pasobra ta tratando di tur manera pa tin un tarifa cu nan por ofrece pueblo di Aruba esun di mas abao posibel y por ta orguyoso di e parti ey cu nan ta un di esunnan mas abao den regio y pa e motibo ey a scoge pa bay reduciendo e fuel oil, cu tur sa cu berdad por ta dañino pa medio ambiente. Enbes di switch pa un fuel oil cu ta mucho mas caro, consecuentemente esaki lo a nifica cu durante añanan atras lo a paga pa tarifanan mas halto kisas den e mesun region riba e mesun prijsnan cu paisnan bisiña ta pagando.

A base di e situacion cu a presenta recientemente, por confirma cu WEB ta ricibiendo e fuel oil for di FMSA, un subsidiario di Refineria di Aruba, cual fuel oil aki ta cuadra cu tur specificacionnan cu locual WEB a bin ta uza durante e añanan anterior y es mas, recientemente a reduci e porcentahe di sulfur den e fuel na 2.8.

Den pasado e tabata semper 3%. Awo ta 2.8%, den cuadro pa mehoracion pa bay poco poco pa reduci e sulfur. Esey tambe por menciona cu e fuel cu WEB ta uzando actualmente ta wordo uza mundialmente y no ta na Aruba so e ta wordo uza. E fuel aki ta wordo prepara, traha, primordialmente pa transporte maritimo cu hasta por menciona cu un averahe di rond di 4 miyon bari ta wordo produci diariamente di e fuel oil aki, di cual WEB Aruba ta consumiendo averahe di 3500 y esey ta resulta cu Aruba ta consumiendo menos di .09% di e total cu ta wordo produci diariamente. Esey ta pa confirma cu e fuel cu WEB ta uzando, cu no ta wordo uza of ta ilegal, of ta contra medio ambiente.

Loke si tin cu menciona ta cu ora cu a bay bek, despues di a ricibi e kehonan di ASTEC, pa confirma e fuel cu a bin ta ricibi, a resulta cu e balor di 3% y recientemente 2.8% sulfur den e fuel, semper a keda manteni na dje. Loke si a resulta ta cu durante periodonan e porcentahe ta varia. Tin momento cu el a baha te na 1.7%. Durante ultimo cinco añanan, no a bay mas leu atras pa mira. Esey ta nifica cu e condicionnan di WEB tabata 3% cu awo a bira 2.8%, pero realidad ta tabata tin momento cu a ricibi fuel cu un sulfur content di 1.7, 1.8% y tin otro biahanan cu ta haya un concentracion mas halto, pero semper dentro di e limitenan cu ta poni den e contract.

Tin cu menciona tambe cu berdad un factor cu ta influencia den e caso aki e area di APA hopi, ta e direccion di biento. Tanto e velocidad di biento, direccion y densidad di biento ta haci un diferencia cu e huma, por sea pasa net pazuid di APA, e ta pasa net riba dje of e por pasa riba un nivel mas halto of si no tin biento, tin biaha e ta sak y esey ta crea un molester pa e empleadonan di ASTEC.

Kico a bin ta haci

Na momento cu a haya e reclamonan ey, a cuminsa haci diferente estudio kico ta posibilidadnan cu por haci pa mehora na prome luga e situacion, pasobra WEB, manera cu a menciona, nan tambe kier opera mas limpi posibel. Ta gusta haci diferente estudio pa evalua kico por wordo haci a termino corto, termino mediano y termino largo, pa un solucion duradero.