Diabierna ultimo, miembronan di Hunta di Supervicion di Stichting Fundacion Lotto pa Deporte a entama un caso sumario contra Gobierno di Aruba, den e caso aki Minister di Salud Publico, Turismo y Deporte, esta Dangui Oduber. E demanda ta pa Corte ordena Gobierno pa suspende e decision di dia 3 di januari 2018, den cual a retira henter e directiva. Esaki te dia cu Corte tuma un decision final den “bodem procedure”. Si no cumpli, ta pidi Hues pa impone un “dwangsom” di 10 mil florin pa dia cu no cumpli.
Tambe, e miembronan di Hunta di Supervicion ta pidi Corte pa ordena Gobierno pa permiti e miembronan haci nan trabou sin stroba nan, te ora yega na un decision den e proceso legal. Ey tambe ta pidi un “dwangsom” di 10 mil florin pa cada dia cu no cumpli. Ta pidi pa ordena Gobierno (Minister Oduber) pa cubri tur e gastonan envolvi den e caso aki.
Stichting Fundacion Lotto pa Deporte lo conta cu dos bufete di top abogadonan den henter Caribe Hulandes. Un fecha pa e caso sumario no ta fiha ainda, tampoco si Gobierno lo uza su mesun Departamento Huridico of lo opta pa uza un bufete di abogado priva pa defende nan decision.
Pa resumi, dia 3 di januari 2018, Minister Dangui Oduber a retira henter e Hunta di Supervision di Stichting Fundacion Lotto pa Deporte, bou di e motibo cu a bin cambio di gobernacion y cu pa continuidad y bon funcionamento si e fundacion. E Gobierno nobo ta tene cuenta cu ta e Gobierno anterior a postula e miembronan aki y cu e Minister nobo ta desea pa retira tur pa asina por postula su mesun miembronan di confiansa.
E miembronan di Hunta di Supervision ta Silvio Janga como Presidente, mr. Benvinda de Sousa como Vice Presidente, Antoniun “Campi” Kamperveen, Flavio Faneyte y Elias Kock como miembronan.
