Parlamentaria di partido POR, Marisol Lopez-Tromp a manda un serie di pregunta na Minister di Educacion, bou kende e parti di centronan di cuido pa mucha ta cay.
Manera ta conoci, Parlamento a pasa e ley pa garantisa un bon calidad di centronan di mucha na Aruba y si tur cos bay manera debe ser, e aña aki (aña escolar nobo) tur e crechenan y centronan pa mucha mester cumpli cu cierto reglanan. Entre esakinan a menciona cu nan mester tin un permiso valido pa por tin un centro, den cual mester cumpli cu diferente rekisito cu ta na beneficio di nos muchanan y nan derechonan.
E preguntanan ta como lo siguiente:
- Kico y cual ta e preparacionnan cu Gobierno ta haciendo pa cu implementacion di e ley tocante calidad di cuido di nos centronan pa mucha?
- Cuanto inspector tin na e momentonan aki pa haci e trabou di supervision riba e centronan pa mucha na Aruba? Gobierno ta pensa cu e cantidad ta suficiente?
- Inspeccion di salubridad lo ta envolvi of por ta encarga cu e parti di higiena y e parti cu ta toca salubridad den e centronan di mucha?
- Con e procedura lo ta pa peticion y otorgamento di permiso? Con esey ta bay wordo regla?
- Tin cursonan, trainingnan y informacion preparatorio ta wordo duna na e lidernan y doñonan di crèche?
- Gobierno a reuni cu e centronan pa mucha riba e exigencianan di calidad pa cu e crechenan?
Parlamentaria Lopez-Tromp ta spera di por haya respuesta mas pronto posibel riba e preguntanan pa asina por haya e informacion pa Parlamento por aporta cu esaki te unda cu por y logra cumpli cu tratadonan internacional.
