Saturday, 19 April 2014
Rudolph “Papa” Soemers ta cumpli 35 aña den servicio di Gobierno Print E-mail
Sunday, 25 August 2013 20:09

front

Rudolph Soemers, miho conoci na su nomber di cariño “Papa Soemers”, recientemente a cumpli 35 aña den servicio di Gobierno. Cuerpo Policial Aruba a celebra e ocacion special aki durante un recepcion special den presencia di su famia. Rudolph Soemers a expresa di ta hopi contento cu el a tuma e decision pa bira Polis y ta bisto cu e ta disfrutando di un bunita carera, cu hopi experiencia interesante y ta contento cu su trabao actual como coordinador di e departamento di Rijbewijs.

Despues cu su rumannan Eric Soemers (na 1979) y Dario Soemers (na 1980) a drenta Cuerpo Policial, nan a keda pidi’e pa e laga su trabao na Brandweer, unda el a cuminsa traha dia 26 di juli 1978 y bin traha hunto cu nan na Polis. Porfin na 1981, Papa Soemers a solicita y a wordo acepta na Scol pa Polis y dia 1 di maart 1982 el a cuminsa e opleiding, cual tabatin un duracion di un aña y mey. Papa Soemers a traha na San Nicolas despues cu el a completa su opleiding (’83-’84) y riba dia 1 di december 1984, el a bay traha na Departamento di Recherche. Na aña 2000 a acerk’e pa bay traha na Inmigracion, na Havenpolitie, cual el a haci te aña 2003, ora cu atrobe a ofrece un otro puesto di Ploegcommandant. Riba dia 1 di mei 2012 a haci un otro cambio di departamento pa su puesto actual, cual ta di coordinador di e departamento di rijbewijs. “Trabao di Polis no ta facil y e ta rekeri hopi pasenshi”, asina Papa Soemers a expresa. El a subraya cu como Polis mester corda pa semper “trata hende mane hende”, pasobra no por haci fout cu hende, mester mantene semper respet pa e otro persona. Esaki ta algo cu e ta trece cune di tempo cu el a traha cu Polisnan di antes cu hopi experiencia y nunca el a cambia. E ta conseha tur hoben cu drenta Cuerpo Policial Aruba pa scucha di nan mentor y nan superiornan kende tin hopi aña di servicio y mester probecha di nan experiencia. E otro conseho ta pa “siña bo leynan bon”, esaki ta algo cu Soemers ta pone un balor halto na dje; e ta splica cu esaki ta hopi importante pa e colega ta bon para den su sapato y ta añadi pa “don’t take chances”, pero semper sa cua ley ta aplica. Finalmente, Papa Soemers ta gradici su dos rumannan pa a pidi’e drenta Cuerpo Policial y su señora kende tabatin comprension y pasenshi cune pa cu e exigencianan di e profesion di Polis. Cuerpo Policial Aruba ta existi desde aña 1986 y ta conta awendia cu mas o menos 600 Polis trahando incansablemente pa brinda siguridad na nos pueblo. Ta trata aki di 375 hende homber, 104 hende muhe y 120 empleado administrativo, trahando den 4 districto, cu Warda nan di Polis situa na Oranjestad, San Nicolas, Noord y Santa Cruz. Orguyosamente Cuerpo Policial Aruba ta conta cu hopi respet internacional, specialmente pa su unidadnan special manera “Motor Unit”, “K9 Unit”, “Arrestatie Team”, “Mobiele Eenheid”, “Duik Team” y “Helicopter Unit”, sin lubida e departamentonan conoci di patruya y recherche cu ta bon entrena y capaz pa investiga y soluciona e casonan mas complica. Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP. Pa mas informacion por subi e website www.kparuba.com.

gallery1 gallery1 gallery1

Comentarionan (1)Add Comment
rock
August 25, 2013
201.229.42.192
Votes: +4
...

Hopi PABIEN CU BO 35 ANJANAN. Papa sinja bo otro colega mescos, TRATA HENDE MANE HENDE".

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter