Wednesday, 22 October 2014
Minister Mr. Drs. Arthur Dowers: Ningun hende a bini den contacto cu asbest Print E-mail
Sunday, 25 August 2013 19:07

dowers asbest

Diabierna Minister di Husticia y Enseñansa, mr. Drs. Arthur Dowers a duna prensa un update encuanto e situacion na Colegio Arubano y Mon Plaisir y e areanan vulnerabel pa loke ta trata e bahamento di dak di asbest na Mon Plaisir Kleuter y Basisschool. Manera e mandatario a anuncia diahuebs caba, e dos scolnan lo keda cera – y a wordo determina diabierna, cu ningun hende excepto esunnan cu ta haciendo e limpiesa specialisa e dianan aki lo ta permiti di drenta e scolnan den fin di siman aki y tampoco riba dialuna.

Dialuna lo determina si pa diamars lo por cuminsa uza e scolnan bek. Posiblemente Mon Plaisir College, di cual solamente e gymzaal ta cay den e area vulnerabel, lo por habri diamars bek den su totalidad. Pa cu esaki Minister Dowers ta consulta cu diferente instancia cu experticio, incluyendo TNO. Minister Dowers a splica cu e preparacion di e proyecto aki a tarda hopi y na momento cu e “gunning” a bin di biaha e compania cu a gana e destaho publico a cuminsa traha. Tabatin diferente palabracion haci cu DTI pa minimalisa e risico y a cera tambe e area vulnerabel pa contaminacion cu baricada y “tape” cu ta indica peliger. E personanan cu a traha den e area tabata protegi debidamente, tambe segun procesonan y coverall segun normanan internacional. E bahamento di e dak a bay den dos fase, unda cu e compania a keda den contacto continuo cu DTI, Dienst Technische Inspectie. Prome mester a baha e blafonnan cu cuidao y paketa e material pasobra aki tambe tabatin entre e blafon cu e dak presencia di stof cu por a contene asbest. Despues a bay over na baha e dak mes, paketa e material y prepara esaki pa transportacion. E forma di traha aki tabata pa evita cu e stof lo bula bay tur caminda na momento di baha e dak. E transportacion tambe a tuma luga di acuerdo cu e normanan stipula pa DTI, cual ta basa riba normanan internacional. Minister Arthur Dowers a splica cu e trabao di baha e dak a tuma un poco mas largo cu loke tabata palabra pasobra cu pa via di e calor tabatin trahadonan cu a bira malo y asina tabatin menos personal trahando riba e proyecto. E mandatario ta splica cu e scol a tuma contacto cune ora cu tabata preparando pa habri y el a recomenda pa tene e scol cera y no laga ningun hende drenta den e area di risico. Minister Dowers a subraya cu den su concepto ta mas importante pa nan caba ruim op tur cos y haci e trabao manera mester ta y no habri e scol den pura y asina pone hende core risico of sinti cu e por ta coriendo un risico. Na momento cu haci un meeting den aire lo por tin un minimo di asbest vezels presente, pasobra calculacionnan ta mustra cu 85% di edificionan na Aruba tin dak cu ta contene asbest ainda. Ademas asbest ta un producto natural, cual por ta presente den aire tur caminda. E concentracion di asbest vezels ta locual mester considera semper y resultadonan di e muestranan cu a wordo manda pa un laboratorio den exterior pa test no a duna un indicacion cu tin risico. Den algun muestra e compania a indica cu no a wak ningun asbest vezels, pero por asumi cu tin menos di tres vezel presente den e aire. Minister Dowers a bisa cu a papia tocante e perdida di les cu e rector di Colegio y e scol lo dicidi kico nan lo bay haci. Minister Dowers a sugeri cu por uza e tempo cu normalmente ta resta na fin di e aña escolar pa “haal in” e les cu a falta, naturalmente cu excepcion di e examenklasnan, pa cual Colegio ta trahando riba un solucion. Pa loke ta trata e caso cu Colegio Arubano a lanta contra Gobierno, Minister Dowers a bisa cu ta ultimo momento el a wordo informa di esaki y ta Corte a vorder pa e trabao wordo para pa e scol habri. Entretanto esey no por a sosode sin mas pasobra e scol mester a wordo haci limpi y ademas a tuma muestra di aire y stof pa cual mester a warda riba e resultadonan. No tin ningun hende a bin den contacto cu asbest y ningun hende ta core risico, Minister Dowers a subraya, añadiendo cu e area vulnerabel ta keda cera te ora cu e limpiesa ta completamente cla. Dos diferente instancia a midi y diferente experto a wordo consulta. Na e forma cu a traha e risiconan ta wordo minimalisa y tambe mester tene den mente cu e asbest vezels ta mara den un producto duro y su concentracion den e producto aki, cual tambe a wordo gecheck, ta tiki. Ademas e biento ta asina fuerte cu e chens ta hopi chikito cu e asbest vezels lo por keda concentra den un area y forma un peliger. Na momentonan aki e maximo esfuerso ta wordo haci, ta trahando ful weekend y ta spera cu pa diamars e scolnan por cuminsa. Lo tin un update dialuna tocante e situacion y ki dia scol lo por cuminsa atrobe.

Comentarionan (1)Add Comment
gergigolo
August 25, 2013
201.229.35.135
Votes: +3
...

DCD bo ta un fracaso naci nada bo a hasi drechi

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter