Friday, 28 November 2014
ATA orguyoso cu crecemento di mercado Latino Americano den e prome mita di aña Print E-mail
Saturday, 17 August 2013 14:25
Comparti

Ronella Tjin Asjoe-Croes, CEO di Aruba Tourism Authority-Headshot

E mercado di turismo procedente for di Latino America ta mustra un crecemento fuerte den e prome 6 lunanan di aña 2013. Cu un aumento di 19.75%, e ta e di dos continente mas grandi pa cu turismo pa Aruba.

“Y riba su mes nos ta masha contento cu prestacion di e mercado aki, specialmente pasobra nos a dedica hopi esfuerso y fondo pa por a logra esaki”, asina Ronella Tjin Asjoe-Croes, CEO di Aruba Tourism Authority a splica. Argentina ta sobresali cu un crecemento di 29.55% cual ta representa un aumento di 1.825 turista. En total 8.002 persona a bishita nos for di e pais aki. Esaki sigui pa e mercado di Venezuela cu a crece cu 20.63% compara cu e mesun temporada di aña pasa. Venezuela ta keda e pais Latino cu ta produci mas hopi turista pa Aruba, cu 61.578 bishitante pa Aruba den e prome 6 lunanan di 2013. E ta e segundo pais mas grandi pa Aruba, despues di Merca. E di dos mercado mas grandi pa cu nos turismo di Latino America ta Brazil cu 9.706 turista pa e periodo di e prome mita di aña 2013, el a aumenta cu 1.75% compara cu aña pasa. Colombia a trece 8.826 bishitante, un aumento di 11.74% y Chile a subi cu 87.82%, 1.157 turista mas compara cu aña pasa cu tawata 1.297 turista. Esaki ta positivo pa un mercado cu ta conta cu apenas 1 aña di inversion pro activo y structural di parti di Aruba Tourism Authority. Pa loke ta trata luna di Juli, e region di Latino America a raporta un crecemento di 17.35% compara cu 2012. Tur mercado importante pa Aruba a crece, Chile cu 63.51%, Venezuela a bay dilanti cu 20.94%, Argentina cu 12.15%, Brazil cu 9.79% y Colombia cu 1.15%. Pa e prome shete lunanan di aña 2013, e mercado di Latino America a cubri 15.39% di total di bishitantenan pa Aruba, cual ta un total di 97.369 den e periodo aki. ATA a introduci hopi cambio den e forma con ta maneha e mercado y con ta promove nos isla den Latino America. Desde 2012 a aumenta e presupuesto y esfuersonan pa capitalisa riba e oportunidadnan, siguiendo e linea di un maneho di diversificacion. Ta haci hopi esfuerso pa aumenta otro mercadonan banda di esun principal pa Aruba, esta Merca. A cambia agencia di publicidad na Venezuela y agencia di relacion publico na Brazil y Argentina. Ta invertiendo mas den publicidad online y social media, den un esfuerso pa atrae turistanan potencial na Latino America, cu awendia ta cumprando pasashi via internet. ATA a introduci cambionan den structura, Colombia a pasa di ta un oficina di ATA pa ta un representation office. E oficina na Brazil lo conoce un director nobo. ATA ta enfocando mas riba e mercado nobo di Chile pa medio di un representation office. No por keda sin menciona e hecho cu ATA ta enfoca mas riba MICE “Meetings-Incentives-Conferences-Exhibitions” cu ta dunando bon resultado. Tur luna tabatin gruponan, den e prome mita di 2013. Na luna di Mei tabatin 3 vuelo charter cu 220 stoel cada un treciendo gruponan di incentivo pa nos isla. Parti cardinal di e acercamento no ta solamente e parti di promocion, pero tambe e parti di aviacion, cual a sigui ricibi hopi atencion! “Mi ta convenci cu si nos sigui riba e rumbo aki, cu sin duda nos lo conoce un aumento general den e mercado Latino Americano na fin di aña. Ta nos intencion pa sigui bini cu campañanan creativo y innovativo pa sigui atrae mas turista for di e mercado aki pa nos isla”, asina Ronella Tjin Asjoe-Croes a termina bisando.

album album  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter