Friday, 31 October 2014
Omar Harms di Ministerio di Asuntonan General: Gobierno y sindicato semper tabata riba mesun liña pa finalmente defini y ehecuta un acuerdo Print E-mail
Friday, 16 August 2013 16:23
DSC_2063
Hunto cu sr. Piet Pronk, Omar Harms como funcionario ehecutivo di Ministerio di Asuntonan General, a forma parti di e grupo di trabou cu a representa Gabinete Mike Eman den e dialogo cu sindicato SEPPA. Prome Minister a pone enfasis cu a trata di un dialogo y no un negociacion, pasobra for di prome instante ambos partido tabatin e mesun meta y esey tabata con mehora e posicion huridico di e werksternan di Gobierno.

Sr. Harms ayera mainta tabata un di e caranan sonriente na momento di a firma e acuerdo den sala principal di Simar na Sabana Blanco. Por a ripara cu pa hopi di e werksternan, e funcionario aki a bira un cara conoci ya cu despues di e acto, varios a acerk’e pa yam’e personalmente danki pa e logro cu den nan bida ta nifica un avance grandi.

Di su banda, e funcionario hoben a splica cu teniendo na cuenta cu esaki ta un bataya cu a cuminsa na principio di decada 90, tanto Gobierno di Aruba como e sindicato tabatin e mesun obhetivo, esta di duna e werkster un miho rangenstelsel. Tambe a indica cu a sinta varios biaha na mesa solamente pa discuti den ki forma y con pa ehecut’e. Mas aleu, e combersacionnan a bay den hopi bon ambiente. E propuesta tabata bay y bin pa haci e cambionan necesario y pesey por a tarda mas di loke ambos partido tabata desea, pero importante ta cu a keda cla.

“Departamento di Recurso Humano ta bay ehecuta e acuerdo. Ta haciendo tur cos posibel pa cuminsa fin di augustus mes,” Omar Harms a indica ayera mainta. Como cu e acuerdo ta conta pa e werksternan di fundacionnan tambe, tur ta wordo notifica aworaki y mester cana un caminda un tiki mas largo via di departamento di financien. Esey ta nifica cu por ta e no ta bira efectivo mas pa augustus pa e grupo specifico ey, pero si e ta cuminsa conta for di e luna aki mes.

Dependiendo di e cantidad di aña di trabou, e aumento pa cada werkster ta varia entre 100 te casi 500 Florin. Mientras mas aña tin trahando, mas entrada lo bay conoce awo. Segun Harms, semper Gabinete Mike Eman tabata consciente di e prioridad cu mester a duna na e punto di agenda aki y pesey mes Prome Minister constantemente tabata supervisa e adelantonan haci den e dialogo. Pa e mandatario como tambe pa su funcionarionan den e Ministerio, sigur ayera tabata un mainta di hopi satisfaccion mirando cu un grupo chikito, pero importante den e aparato gubernamental y den pueblo mes, a keda beneficia di un forma significativo.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter