Wednesday, 20 August 2014
Prome Minister Eman: Scol John F. Kennedy a hunga un rol central y intense den nos sociedad Print E-mail
Monday, 12 August 2013 21:04

front

Para dilanti di e edificio decai unda antes tabata scol tecnico John F. Kennedy, Prome Minister Eman a papia riba e pronto renobacion di e edificio monumental aki. “Esaki ta otro momento historico den renobacion di centro di ciudad”. Eman a papia di e MOU cu a wordo firma cu SOGA pa yega na un renobacion completo di e edificio JFK cu ta un monumento tanto pa e edificio riba su mes pa loke ta trata su arkitectura, como tambe e aspecto hopi profundo y relacion intenso cu comunidad di Aruba.

“E scol aki a produci un cantidad grandi di tecnico cu awe ta lidernan importante den hopi empresa y organisacion na Aruba”. Eman ta corda cu tabatin un concentracion hopi grandi riba e calidad di enseñansa cu tabata wordo duna na e scol tecnico aki. Alumnonan por a siña un ofishi na e scol mes y cu te dia di awe esaki tin un bon nomber. “Esaki ta resalta tambe den e mercado laboral. Ta pesey cu nos ta asina contento cu un scol cu tin tanto nificacion pa Aruba den e aspecto monumental, arkitectonico y historico pa pais Aruba ta para dilanti su renobacion y rescate”. E monumento cu tin un lugar special den curason di pueblo di Aruba ta bay haya su restauracion. Prome Minister Eman tabatin palabranan di gradicimento pa departamento di DOW y Infrateam pa e trabounan di diseño cu a wordo haci. Nan a haci esaki kedando mas cerca posibel di tur aspecto monumental cu mester a tene cuenta cu nan. Banda di su restauracion e edificio ta haya un ampliacion tambe na unda tur departamento di enseñansa por wordo acomoda. Mescos cu su coleganan Sevinger y Dowers Prome Minister Eman a enfatisa cu asina cu e edificio keda cla esaki ta bay scapa Gobierno y pueblo di Aruba un cantidad grandi placa cu actualmente ta wordo paga na huur pa e departamentonan concerni. “Esaki ta un edificio cu ta hunga un rol central den nos sociedad. E ta refleha e calidad di pais Aruba y e calidad di nos aspiracionnan con unda nos kier hiba nos pais den futuro”. Eman a bay bek den tempo y ta recorda con tempo e edificio a wordo inaugura el a wordo dedica na Presidente Mericano John F. Kennedy. “Historicamente ta asina cu na momento cu un edificio wordo dedica na un presidente cay den un estado di deterioro asina, protocolariamente y den bo relacionnan cu e pais di unda e presidente ta bin, e no ta e miho ehempel cu bo por duna. Ta pesey hopi bes mi a pone prioridad pa e edificio aki haya su restauracion. No unicamente pa motibo di e bon relacionnan cu nos tin cu famia Kennedy, pero tambe pa e echo cu un edificio dedica na un presidente di un pais amigo y grandi manera Merca ta den e estado aki, no ta e cos di mas corecto pa nos pais”. Eman ta contento cu renobacion di e scol tecnico aki ta un paso mas leu.

gallery1 gallery1  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter