Wednesday, 23 April 2014
Ban hiba Theo Rodrigues St. Jude Children's Research Hospital na Merca Print E-mail
Wednesday, 03 July 2013 14:47
DSC_2063
"Theo, un mucha homber cu hopi entusiasmo pa bida merese nos ayudo!" Den fin di siman cu a pasa Theo Rodrigues a bishita Boneiro cu e proposito pa conose y siña windsurf for di e talentoso y windsurfer professional, Elton "Taty" Frans. Taty na su turno a keda inspira pa Theo su entusiasmo pa disfruta di bida na su manera y ta disidi pa hasi lo maximo pa yuda Theo. 

Theofilo "Theo" Rodrigues ta un mucha homber di 9 aña di edad y ta bibando actualmente na Curacao. Dia 26 di December 2011, despues di un accidente, e la fractura su brasa drechi malamente. E docter nan a disidi pa pone e brasa den gips y despues pa sigi su tratamento. Ora cu docternan a bai scan e brasa pa examina e fractura mihor, nan a constata cu tin un kiester den e brasa. Nan a laga e brasa den gips te cu comienso di April 2012. Na momento cu a kita e gips tur cos tabata mustra bon, pero no a dura mucho cu Theo a sinti dolor atrobe. A examina su brasa y a ripara cu tin un bulto y esaki tabata hasi bastante dolor. E mayornan a bai diferente docter na Curacao cu a manda nan di cashi pa muraya sin por duna nan un respuesta concreto of por a yuda nan pa risibi un diagnostico pa por sigi cu tratamento.

Na Mei 2012 cu ayudo di familiares e mama a biaha cu Theo pa busca un respuesta na Venezuela. Ora cu nan a hasi e test nan, e docter a bisa e mama cu Theo mester opera urgentemente pa motibo cu e brasa ta hopi fractura y cu nan no por a hasi un biopsy. Nan a opera Theo kitando un weso di su pia y husa esaki como refuerso pa su brasa. E resultado tabata mustra positivo di e banda di e docternan. Asina nan a regresa Curacao pa Theo por a sigi su recuperacion. Na September 2012 un biaha mas Theo ta sinti dolor den su brasa y aki e ta wordo manda cu urgencia pa Venezuela serca e docter cu a opere. Nan a constata cu lo mester hasi un transplante completo di e weso pero na Venezuela no ta tin e weso na e momento ei. Nan a wordo manda Colombia cu urgencia. Na Colombia e docternan a opta pa hasi un biopsy di e brasa prome cu e operashon. Despues di e biopsy aki, Theo su situacion a empeora y e cancer a plama bai den su pulmon nan. Theo mester a hasi 3 luna di chemo therapia pisa pa e por a mehora su salud. Despues di hopi discucion cu SVB na Curacao, nan a bin disidi pa manda Theo, Hulanda pa mira si einan por a bin cu un mihor cuido y diagnostico. Na Hulanda docter nan ta constata cu no por hasi nada mas pa e man y cu lo mester amputa esaki mirando cu e cancer ya caba a plama den ful e brasa y tabata direccion pa e pulmon. Durante tur e desaroyo nan aki, Theo ta bon na tino y sa tur e paso nan. 
 
Despues di operacion cu a amputa Theo su man e la a lanta hopi aturdi y tabata grita pa nan pone su man bek. Despues di esaki Theo a lanta bek cu e mesun entusiasmo cu e tabata tin semper y cu hopi speed. Asina ki Theo a sigi un biaha mas cu chemo therapia pa trata su pulmon nan. Docternan a disidi  pa hasi un operacion grandi na Mei 2013 na e pulmon nan di Theo cu a saca 13 tumor. Despues di e operacion docternan a duna e mama un mal noticia cu e cancer a bolbe bek y cu no lo tin cura pe. 

Theo su mama no ta 'give up' y ta dispuesto pa busca un cura of un milager pa Theo. Pa motibo aki e mayornan ta planiando pa hiba Theo, St. Jude Children's Research Hospital na Memphis, Tennessee, Merca cu ta specialisa den diferente enfermedad incluyendo tur tipo di cancer di mucha. Sin nos y boso yudansa financiero Theo no por yega Merca pa motibo cu ya caba SVB na Curacao no ta cubri pa su gasto mediconan y mucho menos pa bai Merca. 
 
Asina aki nos di Young & Talented ta pidi pa pone man na boso curason y duna un donacion financiero di e manera cu abo por y manda esaki na MCB Bank Curacao Account # 103.282.104, Swift: MCBKCWCU, Cecilia Maria Rodrigues Fonseca. E team di Young & Talented tambe ta presente na Aruba Hi-Winds te cu dia 7 di Juli, pasa na e tent di Bonaire pa mas informacion. Tambe pa mira Theo windsurf pa prome biaha por bai riba e Facebook page di Taty Frans via https://www.facebook.com/TatyNB9.

dowers dowers dowers
dowers   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter