Saturday, 20 December 2014
Gabinete Mike Eman: Bentahanan Fiscal importante pa stimula actividad y innovacion economico na Aruba Print E-mail
Monday, 24 June 2013 19:50
Comparti

mike bentahanan

Den un conferencia di prensa di Gobierno dialuna mainta Minister di Asuntonan General Mike Eman hunto cu Minister encarga cu Asuntonan Economico Michelle Hooyboer Winklaar a duna un splicacion di e motibonan tras di e reforma fiscal cu ta bay keda publica e siman aki. Ta trata aki di reformanan fiscal cu a keda aproba den e plataforma di Dialogo Social, den luna di november 2012.

En general por bisa cu e reformanan fiscal tabata necesario pa hopi tempo caba, ya cu loke tabata existi tabata haci cu no tabata atractivo pa comerciantenan inverti den nan negoshinan. Practicamente por bisa cu no tabata existi incentivo pa comerciantenan mehora nan producto. Gabinete Mike Eman a mira e necesidad y a dicidi cu, enbes di tuma decisionnan unilateral, consulta cu su partnernan social den e plataforma di Dialogo Social. Prome Minister dialuna mainta a splica prensa cu e idea tras di e reforma ta cu kier logra tres cambio importante: crea un regimen fiscal nobo cu ta stimula e economia, specificamente den e parti di San Nicolas; crea un facilidad mas extenso pa locual ta trata e servicionan y incentivo pa companianan cu dicidi di establece nan mes na San Nicolas; y por ultimo un ley general pa promove inversion rond Aruba, creando incentivonan fiscal. Gobierno, hunto cu su partnernan den Dialogo Social a dialoga extensivamente riba e topico aki y na final a yega na un acuerdo na final di aña pasa. Un comision di expertonan apunta pa gobierno, gremio sindical y comercial a keda cu e tarea grandi pa duna contenido na e acuerdonan. E reformanan fiscal ta consisti di leynan nobo, cambionan den leynan existente y cambio di manehonan riba tereno fiscal. Companianan cu establece nan mes den un area specifico, defini den ley, ta haya cierto bentahanan fiscal cu ta haci'e atractivo pa inverti y establece nan mes na San Nicolas. E reduccion cu e companianan aki por haya riba e winstbelasting ta varia di entre 10 pa 15%, dependiendo si ta establece den e zona demarca, e cantidad di personal of 75% di nan operacion ta basa riba exportacion. Esaki ta referi na negoshinan estableci den Zona Franca. Kedando den e mesun parti aki di Zona Franca, a haci un cambio tambe cu ta haci posibel cu un porcentahe mas grandi di nan negoshinan por ta dirigi riba mercado local (awor e ta 25 porciento). Pero e condicion cu ta pone na esaki ta cu e comerciante mester haci un inversion mas grandi y e cantidad di empleadonan mester ta substancialmente mas hopi. E cambionan ariba menciona y otronan cu e ley di reforma fiscal ta contene tin un meta grandi su tras: stimula e economia di Aruba. Gobierno ta kere cu no tin miho manera pa laga e economia crece cu crea incentivonan pa e inversionnan wordo aumenta. “Nos ta hopi contento cu e ley aki, nos ta sumamente gradicido na e partnernan social tanto sindical como comercial cu un bes mas durante e Dialogo Social na November a duna un aporte grandi pa asina nos yega asina leu. Tambe na tur e expertonan, tanto di e gremio sindical, di comercio y expertonan di gobierno mes,” Eman a indica e mainta aki.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter