Monday, 01 September 2014
Office Systems Aruba ta cla pa muebla edificio renoba di Corte Print E-mail
Monday, 24 June 2013 16:23
DSC_2063

E no ta bay solamente pa compra di mueblenan, sino tambe pa diseña henter e interior di e edificio, particionnan y percura cu a base di e set-up, cu e empleadonan por traha mas eficiente posibel y brinda mas y miho servicio.

Ta den e cuadro ey Office Systems Aruba a gana e destaho publico pa realisa e proyecto di e edificio renoba y amplia di Corte di Husticia situa den John G. Emanstraat. Diahuebs mainta Carlos Maduro, director di Office Systems Aruba a firma e acuerdo di trabou cu Monumentenbureau, FDA y Gobierno di Aruba.

Office Systems Aruba ta existi pa 20 aña caba y a sa di desaroya su mes for di un tienda di bende mueble y acesorionan pa oficina, den un compania cu ta ofrece servicio completo for di pinta mapa, asambla mueblenan na midi y gusto, instalacion y asina por sigui menciona. E compania a evoluciona den e ultimo añanan di tal forma cu awendia nan ta e representante di Dauphin Human Design Group, cu ta e marca di stoelnan mas renombra di Europa.

Na Office Systems Aruba nan ta diseña e mueblenan, ta haci uzo di productonan di calidad Europeo, pero ta asambla e material na Aruba mes cu su personal bon prepara pa por sigura calidad halto na normanan Europeo den tur nan productonan. Office Systems Aruba ta masha orguyoso cu nan tin nan propio fabrica aki na Aruba mes, cu ta provee trabao pa nos mesun hendenan y e placa ta keda na Aruba y no ta wordo manda exterior pa compra di e mueblenan. Esaki ta haci Carlos Maduro como Arubiano hopi orguyoso, cu na Aruba mes por ofrece e experticio y experiencia pa un proyecto asina grandi.

Ademas di provee tur e mueblenan pa e edificio di Corte recientemente restaura, Office Systems Aruba ta envolvi tambe den e proceso di preservacion di cierto elementonan paden di e edificio. “E calidad cu nan ta pidi ta hopi halto, dus e ta un proyecto challenging, pasobra tin un parti cu ta monumento y un parti nobo,” asina Carlos Maduro a splica. Den e parti monumental tin algun elemento cu mester wordo manteni den nan estado original, pero mester mustra manera nobo, pues mester wordo restaura, el a añadi, esaki tambe Office Systems Aruba mester tene cuenta cune.

Den e siguiente simannan lo traha riba e aspectonan di seguridad den e edificio nobo y ora an ta cla, e ora ey Office Systems Aruba por drenta pa por haci nan trabounan. “Nos aki cuater luna ta ful cla pa entrega, nos ta cla pa ranca sali. Nos ta entrega tur cos netjes, nos tin un plan di ehecucion cla caba pa con nos ta bay instala y con lihe nos mester traha den e edificio nobo aki”, asina Carlos Maduro a bisa.

Office Systems Aruba ta masha orguyoso di e producto final, esta con e edificio renoba y e parti nobo di Corte di Husticia a keda. E compania Arubiano ta mas orguyoso awor cu nan por forma parti di su embeyecemento dor di percura pa instala mueblenan di calidad halto pa mantene of subi e balor di e edificio y pa e empleadonan por traha comodo y eficiente.

dowers dowers dowers

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter