Saturday, 19 April 2014
Caribe Hulandes a keda representa na e conferencia di Caribbean Studies Association na Grenada Print E-mail
Friday, 07 June 2013 11:22
DSC_2063
Dialuna ultimo a cuminsa e conferencia annual di e Caribbean Studies Association (CSA) cu tema “Caribbean Spaces and Institutions: Contesting Paradigms of Development in the 21st century.” E conferencia aki ta e di 38 edicion y ta consisti di un siman yena cu presentacionnan, reunionan y workshops riba diferente tema relaciona cu e islanan den Caribe.

E associacion aki ta uno multidisciplinario, pues un bes pa aña artistanan, sociologonan, antropologonan, psicologonan, cientificonan politico entre otro, ta reuni y presenta nan investigacionnan, experencianan, proyectonan y bukinan. E plataforma aki, cu tin e islanan di Caribe como su unico focus, ta esun di mas grandi den e region Caribe. Caribbean Studies Association ta conta cu mas di 1100 miembronan. Tur aña e conferencia di CSA ta scoge un lugar den Caribe pa tene e evento. Den pasado, e conferencia aki a tuma lugar den Caribe Hulandes tambe, specificamente na aña 1980, 1995 y 2011 e conferencia a tuma lugar na Curaçao y na aña 2001 e conferencia a tuma lugar na St. Maarten.

E aña aki, e isla di Grenada a keda scogi pa ricibi bishita di academiconan, practicantenan y artistanan den e region. Caribe Hulandes a conta cu presentacion di 7 persona. Dr. Francio Guadeloupe (Aruba), docente di antropologia na Universidad di Amsterdam, a pone un panel hunto consistiendo di Esmee Willemse (St. Maarten), studiante di master den antropologia na Universidad di Utrecht; Sharelly Emanuelson (Curaçao), studiante di master den artistic research na Royal Academy of the Arts na Den Haag; y Rosabelle Illes (Aruba) candidato di PhD den psicologia social na Universidad di Leiden. E panel aki a presenta ariba desaroyo den Caribe Hulandes den cuadro di nos medio ambiente. Specificamente, Willemse a presenta algun idea di Tim Ingold y Édouard Glissant relaciona cu educacion na St. Maarten y con esaki por mehora e relacion entre ciudadanonan y nan medio ambiente. Emanuelson a presenta partinan di su documentario titula “Korsou: Su solo i playanan” unda por mira e relacion entre ciudadanonan di Korsou y nan lama y con esaki ta refleha e desaroyonan cu a tuma lugar na Korsou y e consequencianan. Illes a explora e potencial di mediacion como manera pa maneha conflictonan di medio ambiente na Aruba y kico mester sosode pa desaroya un cultura di mediacion na Aruba.

Den otro panelnan tawata tin presentacionnan di Gregory Richardson (Aruba) docente na Instituto Pedagogico Arubano, cu a analisa e musica di Soca (Roadmarch) na Aruba y maneranan nobo pa wak e musica di calypso como un forma di critica contra cierto status quo na Aruba. Ademas, Arjen Alberts (Hulanda/St. Maarten) a compara Aruba y St. Maarten y a explora e limitenan di e paradigma tradicional di e desaroyo di e islanan. Finalmente, Okama Ekpe Brook (St. Maarten) a duna un presentacion tocante con nos ta logrando e desaroyonan di milenio na Korsou y St. Maarten.

Cu e presencia di e academiconan y artistanan aki, Caribe Hulandes a keda representa na e conferencia importante di Caribbean Studies Association. Ta crucial pa mas profesionalnan di Caribe Hulandes asisti e conferencia aki den futuro pa asina comparti ideanan, analisis y investigacionnan cu otro academiconan den region. E intercambio aki por trece colaboracionnan significante cu por yuda nos integra den e region segun cu nos ta desaroya como islanan den Caribe. E siguiente conferencia di CSA lo tuma lugar na Merida, Mexico den e luna di mei 2014. Pa mas informacion tocante CSA y e conferencia bishita nan website: www.caribbeanstudiesassociation.org

dowers dowers dowers
dowers dowers  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter