Thursday, 02 October 2014
Cifranan real di turismo pa luna di mei ta sumamente positivo pa nos isla Turismo crucero a aumenta cu 221.7% y turismo stay over cu 10.56% Print E-mail
Thursday, 06 June 2013 19:18

JIM 0762res

Diahuebs mainta Minister Otmar Oduber tabatin un conferencia di prensa pa presenta e cifranan di turismo pa loke ta trata luna di mei, cual ta mustra resultadonan sumamente positivo pa nos industria principal. Hunto cu Minister tabata Ronella Tjin Asjoe-Croes, CEO di ATA SG y tambe Jim Hepple, Director di AHATA.

Minister Oduber a indica cu por a mira cu recientemente tin hopi discusion riba cifranan, nan origen y e aspecto di realidad cu nan tin. “Mi kier a cuminsa na bisa cu e cifranan aki ta wordo compila pa personanan cu ta traha na oficina di turismo; tin un team cu ta compila esakinan a base di trabounan cu ta wordo haci dor di IASO, oficialnan di imigracion na aeropuerto cu ta scan tur hende cu ta drenta Aruba”. E mandatario por a scucha cu ta wordo bisa cu hendenan ilegal ta wordo conta den e cifranan aki y esnan cu ta pasa Aruba como hub tambe, pero a clarifica cu e programa cu ta wordo usa ta uno cu a wordo traha pa un experto na Aruba bou di gobernacion anterior, dus no ta cifranan cu Otmar Oduber ta inventa”. Ta trata di cifranan cu ta wodo produci a base di un bon programa, Radex di cual Aruba ta un ehempel den Caribe. Kiermen ora ta scucha cu cifranan ta wordo manipula, Minister Oduber ta lamenta esey masha hopi, pasobra ta un atake directo pa e funcionarionan cu ta compila e cifranan. Papiando di e resultadonan di turismo crucero pa luna di mei, por mira cu e cantidad di pasaheronan crucero na 2012 tabata 8,164 y e aña aki e la subi te na 26,260 cu ta un aumento di 221.7%. E cantidad di tripulantenan a aumenta e aña aki cu 259.6% compara cu e mesun luna aña pasa mientras cu e cantidad di barconan cu ta bin Aruba a crece di 3 barco pa 12 barco, lo cual ta representa un aumento di 300%. Comparando e promer 5 lunanan di 2013 cu e mesun periodo di 2012, por bisa cu aña pasa Aruba tabatin 351,759 pasahero crucero y e aña aki 338,627, cu ta un crecemento di 10.5%. Cantidad di tripulantenan a subi cu 11.8% y e cantidad di barconan a crece ccu 12.7% di 173 barco te na 195 barco. Mirando e datonan di mei pa loke ta trata turismo stay over, Minister Otmar Oduber a indica cu den e luna aki na 2012 a ricibi 65,792 bishitante y na 2013 e la subi te na 72,746 cu ta representa un crecemento di 10.56%. E mandatario ta sumamente contento cu e resultadonan aki y a gradici tur esnan den e industria cu a contribui cu e resultadonan aki, manera ta ATA, AHATA y APA, pero tambe na tur nos hendenan cu ta brinda e servicio na nos bishitantenan y cu ta e factor clave cu nan ta desea di regresa pa un siguiente vacacion.

Comentarionan (1)Add Comment
daniel1
June 07, 2013
201.229.41.237
Votes: +2
...

Anto segun Banco Central circ*lashon di plaka a baha.....Boso por stop di ganja y cuminsa traha drechi pa pueblo?

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter