Thursday, 18 December 2014
President di ATIA, Sr. Ronald van Trigt: Nos ta kere den e plataforma aki y en berdad e por bira un pilar economico pa Aruba Print E-mail
Friday, 19 April 2013 18:29
Comparti

DSC 0240

President di ATIA, Sr. Ronald van Trigt ta hopi complaci cu e desaroyo di e iniciativa ‘Europe Meets The Americas’ (EMA) y tin expectativanan grandi pa loke e evento por nifica pa e economia di Aruba. Asina e empresario a expresa durante e conferencia di prensa ofreci e siman aki caminda a presenta e ultimo avancenan pa e conferencia cu lo tuma luga den luna di mei proximo.

E lider di e asociacion empresarial riba nos isla a bisa “Nos ta kere den e plataforma aki y nos ta wak’e como un comienzo” indicando cu e evento ta habri hopi oportunidadnan nobo pa e sector comercial local y e momento pa actua ta awo. Den su presentacion pa prensa, Sr. Van Trigt a cuminsa na indica cu pa ATIA ta sumamente importante pa ta presente den henter e proceso di 'Europe Meets The Americas' pasobra e organisacion tabat’ey for di su nacemento como idea. Ta asina cu ATIA a tuma e iniciativa un aña y mey pasa pa bishita Brasil y a forma parti di e delegacion dirigi pa Prome Minister Mike Eman. Mirando e reaccion na e pais carioca como tambe na Colombia, “ATIA a reconoce cu Aruba tin un potencial hopi particular cu por probecha como comercio, un pilar nobo como un brug entre Latinoamerica, Centroamerica y Europa,” van Trigt a bisa. En berdad e interes di parti di e paisnan Latinoamericano ta sumamente grandi. Rapidamente, e comision organisado di ‘Europe Meets The Americas’ cu ta conta cu participacion di varios NGO incluyendo ATIA, a logra firma cu rond di 20 compania cu a registra caba pa bin Aruba y ta varia entre productor di lechi y carni, como tambe di sector construccion, plastic, etc. Sr. Van Trigt a conta cu tabatin oportunidad di bishita un cantidad grandi di nan y combersa directamente cu nan gerencia. E empresarionan Latinoamericano ta reconoce cu Aruba por hunga un papel fundamental den e relacionnan comercial entre nan pais y Europa. Pero pa Aruba, e conferencia y su resultadonan ta habri un gama di posibilidad. “E sentimento cu nos tin ta cu tambe pa comercio local tin hopi oportunidad nobo dor di e conferencia aki y dor di topa e bishitanantenan di Brasil y Colombia, pero tambe Panama y otro paisnan di e region cu ta bay bin Aruba.” E lider empresarial a splica cu e interes demostra ta surpasa e expectativanan, te na un punto cu mester a scoge cua compania ta participa y unda tin mas potencial. “E ta un evento cu si nos keda inverti den dje, en berdad e ta un pilar economico nobo pa nos pais,” asina van Trigt a afirma. Pesey mes como President di Aruba Trade & Industry Association, Sr. van Trigt a probecha e oportunidad pa haci un yamada special na miembronan di comercio local pa pone atencion riba loke ta sosodiendo aki. “Nos ta desea pa mas tanto posibel crea posibilidad pa comerciantenan local participa. Nos ta crea un comercio nobo di representacion, di distribucion, di retail, relacionnan den Caribe…tur oportunidad nobo; pero nos mester tey!” E organisacion ta conta cu 250 compania miembro cu ta dunado di trabou pa un 15 mil persona, representando 40% di e mercado laboral local priva. E conferencia ‘Europe Meets The Americas’ cu gobierno ta organizando hunto cu sector priva y Hulanda ta djis e comienzo di algo cu lo sigui crece. Sr. Van Trigt a reitera e importancia pa despues sigui di cerca e contacto y relacionnan cera pa Aruba haya di berdad e funcion di ‘hub’ cu ta e deseo di ATIA. E lider empresarial a finalisa bisando cu “Negoshi ta manera un porta, un bes bo habri un, bo no sa cuanto mas bo ta haya su tras” y ‘Europe Meets The Americas’ ta un ehempel perfecto di esey.

Comentarionan (1)Add Comment
Cerilio D
April 19, 2013
201.229.73.247
Votes: -2
...

Sorry pero ami NO ta wak beneficio pa Aruba den e wega aki di Hulanda. Mustra mi den cifras kko ta loke nos Aruba ta bai hanja di tur e cos aki. Cua companianan local tin beneficio? E grandinan so. E chikitonan lo keda chambon manera semper na banda di e haragan golos. Arubiano habri wowo, e cos aki ta un manera di Hulanda pa gana placa riba nos custia atrobe. Nederland zal ervan genieten y danki na nos PM nos (e chikitonan) lo keda chambon di tur cos.

Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter