Sunday, 21 September 2014
DTI ta sigui keur auto riba diasabra Print E-mail
Friday, 19 April 2013 14:50
DSC_2063
Dia 6 di april ultimo DTI tabata tin su prome keuring di auto extra riba diasabra pa e aña aki. Contrario na keuringnan anterior riba diasabra cu a bay segun “first come first serve”, riba diasabra 6 di april e keuringnan a bay segun cita.

E keuringnan a tuma luga di 8 or di mainta pa 3 or di ataradi y tabata tin 210 auto riba e lista di cita, cu tabata 35 auto pa cada ora di keuring.

E sistema di keuring aki a funciona hopi bon tanto pa e cliente como e empleado di DTI. E cliente por a presenta su auto cu tur tranquilidad durante e ora di su afspraak y e empleado por a keur sin e presion di tin hopi cliente constant riba dje.

Di e 210 auto un total di 166 a presenta pa keuring y di esakinan a keur af un total di 44 (21%). E autonan cu no a presenta pa keur lo no bolbe haya un afspraak riba diasabra. A anuncia debidamente e condicion aki den e comunicado anterior.

E siguiente diasabra cu lo keur auto ta dia 27 di april proximo. Despues lo sigui riba 4 y 18 di mei. Pa dia 4 di mei e lista di afspraak ta yen caba. Intencion ta pa keur auto riba por lo menos 2 diasabra pa luna.

Por traha afspraak pa keur auto riba diasabra via telefoon (5842096), fax (5842008/5842395) y via email (dti@setarnet.aw of por pasa personalmente na oficina di DTI – Pos Chiquito 47. Si ta pidi un afspraak via fax of email mester manda e formulario di registracion di Ontvanger pa por haya e datonan di e auto.

E sistema di afspraak riba diasabra ta pa ora manera menciona y ta suplica pa no laga e ora pasa y ta presente por lo menos 15 minuut prome cu e ora di afspraak pasa. Por ehempel si e afspraak ta entre 10 or y 11 or presenta e auto entre 10 or y 10 or y 45 minuut.

E keuring riba diasabra ta pa e doñonan di auto cu no tin un afspraak ainda. Un biaha mas ta subraya cu autonan cu un afspraak cu no presenta pa keuring lo no haya un afspraak riba un siguiente diasabra. Si un of otro motibo no por presenta e auto pa keur ta pidi pa avisa tempran pa asina por brinda otro doño di auto oportunidad pa por keur su auto.

DTI ta spera cu e doñonan di auto haci uzo di e servicio extra aki di keuring di auto riba diasabra. DTI lo sigui traha pa brinda cada bes mas y miho servicio na su clientenan y e comunidad.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter