Tuesday, 21 October 2014
Elvis Tjin Asjoe: Eyfo hopi hende kier haci negoshi cu Aruba Print E-mail
Thursday, 18 April 2013 20:28

elvis

Conferencia 'Europe Meets the Americas' (EMA) tin tur e elementonan necesario pa bira un evento exitoso y productivo pa tur e partidonan envolvi. Segun e Senior Policy Advisor di Minister di Asuntonan General, Elvis Tjin Asjoe, e iniciativa di Gabinete Mike Eman pa comberti Aruba den un hub entre comercio di Europa y Sur y Centroamerica, tin e potencial pa bira un pilar adicional di nos economia y aumenta nos GDP cu aproximadamente 15%.

Esey ta algun di e ponencianan presenta dor di e experto economico durante e conferencia di prensa duna ayera tardi riba e evento cu ta bay tuma luga den luna di mei proximo. E realisacion di e prome Europe Meets the Americas ta bin despues di un caminda den cual a substancia e vision di Gabinete Mike Eman pa medio di e Ministerio di Asuntonan Economico encabesa pa Minister Michelle Hooyboer-Winklaar. A realisa un sondeo di e interes y posibilidad pa despues crea un comision encarga cu ehecucion di e plan. Den e esfuerzonan aki ta involucra e participacion balioso di instancianan experto den e tema manera ARINA, Freezone, ATIA y Camara di Comercio, entre otro. Ta importante pa menciona e envolvimento di cuater organisacion clave manera PriceWaterhouseCoopers, Deloitte, KPMG y Ernst & Young cu a encarga delegacionnan pa participa den tur e sesionnan di brainstorming, Tjin Asjoe a menciona. El a sigui splica cu no solamente nan ta aportando pa crea e structura di Aruba como’gateway’ pero tambe ta promove e evento den un forma duradero. E ultimo aki ta un aspecto relevante ya cu 'Europe Meets the Americas' no ta un evento di un solo biaha, pero lo sigui ripiti cada aña y conta cu su debido seguimiento pa asina duna base y continuidad na e esfuerzonan comercial. Gobierno pa un tempo caba ta trahando duro riba e promocion di 'Europe Meets the Americas'. Na december ultimo, a realisa un ‘kick off session’ na Hulanda cu socionan interesa. Na Aruba a realisa un lansamento na e Europe House y ademas di esey, tin algun luna realisando sesionnan local cu participacion di Minister di Asuntonan Economico y comerciante y empresarionan local. Tambe a haci ‘roadshow’ cu varios Minister na Panama, Brasil y Colombia. Tur e pasonan aki tin un meta determina y esey ta loke Sr. Tjin Asjoe a splica na e medionan. “E esfuerzo grandi di Gobierno y sector priva pa promove e evento y Aruba como Gateway ta pa laga esaki bira otro pilar economico cu ta reinforza e economia di Aruba. E mester bin riba e GDP cu Aruba tin caba y crea cuponan di trabou.” Den e paisnan cu a bishita, a realisa acuerdonan di cooperacion den area di energia, exportacion di carni y erosion di costa. E conocemento di Hulanda y Europa hunto cu TNO y otro institutonan cu ta mustrando interes di bin Aruba, ta habri e posibilidadnan hancho. Sr. Tjin Asjoe, kende anteriormente tabata Minister di Asuntonan Economico di Antias, a haci un invitacion na tur esnan interesa pa bishita e pagina www.eumeetsamerica.com caminda por wak e cantidad grandi di compañía cu a inscribi caba. Despues a repasa e lista di paisnan ya menciona, el a indica cu fuera di esey ta hayando interes for di diferente parti di mundo. El a finalisa bisando cu “Ey 'fo hopi hende cu kier haci negoshi cu Aruba.”

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter